«Aınabulaq» sport kesheninde Almaty qalasynyń ákimshilik jáne memlekettik qyzmetshileri arasynda ulttyq sport túrleri boıynsha spartakıada ótti.
Qazaqstan Respýblıkasynyń Memlekettik qyzmetshiler kúnine oraılastyrylǵan is-sharada ákimdik basqarmalary, departamentter bólimsheleri arasynan shyqqan sportshylar ózara kúsh synasty.
Bul saıysta negizinen qazaqtyń ulttyq sport oıyndary basty nazarǵa alyndy. Dálirek aıtqanda qazaq kúresi, arqan tartý, toǵyzqumalaq, armreslıng, gir sporty boıynsha jarysqa tústi.
Spartakıadanyń maqsaty – memlekettik qyzmetkerler arasynda salaýatty ómir saltyn qalyptastyrý. Sondaı-aq ulttyq sport oıyndarynyń mereıin asyrý, ulyqtaý, óskeleń jas urpaqtyń aldynda ulttyq rýhanıatymyzdy dáripteý bolyp esepteledi.
«Arnaıy mereke aıasynda Almaty qalasynyń memlekettik qyzmetshileriniń basyn qosyp uıymdastyrdy. Bul sporttyq is-sharada erekshelik bar. Iaǵnı, quqyq qorǵaý organdarynyń qyzmetkerleri qatystyrylmady. Óıtkeni, sport olardyń kúndelikti aınalysyp júrgen etene jaqyn salasy bolyp esepteledi. Bul ádildik boldy. Olarǵa ózara jeke uıymdastyrylyp qalar. Osylaısha ákimshilik qyzmetter baǵytyndaǵylar ǵana saıysty», - dedi Almaty qalasy boıynsha memlekettik qyzmetter isteri agenttiginiń ókili Maqsat Jańbyrshıev.
Spartakıadanyń ádil ótýi jáne ádil baǵalanýy tek qana tóreshiler qolynda. Jarystyń bastalar sátinde tóreshiler qaýymy ádilqazy alqasy bolýǵa, adal báseke uıymdastyrýǵa sert berdi.
«Bul saıystyń mereıi ústem. Ulttyq sport túrleri boıynsha jarystar qamtylǵan. Naqtyraq arqan tartys, qazaq kúresi, asyq atý, toǵyzqumalaq, gir tasyn kóterý jáne t.b. Utqan quramaǵa Almaty qalalyq Sport basqarmasy taǵaıyndaǵan medal, gramota, baǵaly syılyqtar tabystaldy», - dedi Qazaq kúresinen joǵary ulttyq dárejedegi tóreshi Bolatbek Ibragımov.