Jurtshylyqtyń basym bóligi polısıanyń jumysyna kóńilderi tolmaıdy.
Qazaqstandyqtardyń jartysynan kóbi memlekettik qyzmetshiler arasynda tek "jedel járdem" men órt sóndirýshilerdiń qyzmetine «qanaǵattanarlyq» degen baǵa berip otyr, dep habarlaıdy Almaty-akshamy.kz QazAqparatqa silteme jasap.
QR Ulttyq statısıka búrosy júrgizgen zertteýge sáıkes, qazaqstandyqtar memlekettik qyzmet kórsetý sapasyn byltyrǵyǵa qaraǵanda joǵary baǵalap otyr. Jedel medısınalyq kómek qyzmetiniń sapasyna tolyq qanaǵattanatyn qazaqstandyqtardyń úlesi 54,6%-dy qurasa, órt sóndirý qyzmetine 50,2% otandasymyz rıza.
Odan ári polısıa qyzmetiniń sapasyna qanaǵattanǵan qazaqstandyqtardyń úlesi 43,7%, «Azamattarǵa arnalǵan úkimet» memlekettik korporasıasy 43,3%, salyq qyzmeti 43% jáne basqa memlekettik qyzmetter boıynsha 39,9%-dy quraıdy. Zertteýge qatysqan respondentterdiń memlekettik qyzmettiń sapasyna qatysty birneshe jaýapty tańdaýǵa múmkindigi boldy. Onyń ishinde «qanaǵattanbaımyn», «ishinara qanaǵattanamyn jáne qanaǵattanamyn», sonymen qatar «jaýap berýge qınalamyn nemese qoldanbaımyn» degen nusqalar boldy.
Memlekettik qyzmet kórsetý sapasyna tolyq qanaǵattanǵan respondentterdiń úlesi qala turǵyndaryna qaraǵanda aýyldyq jerlerde basym. Máselen, jedel medısınalyq qyzmetke aýyl turǵyndarynyń 53,3% oń baǵasyn berse, qarsy qala turǵyndarynyń 56,9%-y qyzmet sapasyna qanaǵattanbaıdy. Sol sıaqty salyq qyzmeti boıynsha aýyl turǵyndary 49,6%-ǵa qanaǵattansa, al qala turǵyndary 39,5%-ǵa rızashylyǵyn bildirip otyr. Odan bólek, halyqqa qyzmet kórsetý ortalyǵynyń qyzmeti aýylda 48,7%, qalada 40,4%-ǵa, jáne polısıa aýylda 48,5% tıisinshe qalada 41,1%-ǵa baǵalandy.
Al órt sóndirý qyzmetiniń sapasyna birdeı baǵa berildi deýge bolady. Aýyl turǵyndary 50,3% bolsa, qala turǵyndary 50,1%-ǵa oń baǵasyn berip otyr. Respondentter kóbinese polısıa qyzmetine qanaǵattanbaıdy. Zertteýge qatysýshylardyń 4,4%-y birden qanaǵattanarlyqsyz degen baǵa berdi. Byltyr da solaı bolǵan. Salyq qyzmetiniń sapasyn respondentterdiń 2,8%-y (2021 jyly - 2,9%), HQKO - 2,6% (2021 jyly - 3,3%), jedel medısınalyq kómek - 2,5% (2021 jyly - 2,7%), órt sóndirý qyzmeti - 1,5% (2021 jyly - 2,7%) qanaǵattanarlyqsyz dep baǵalady.