Aqparattyq jumys sapasyn damytý mindeti tur.
Qazaqstannyń Aqparat jáne qoǵamdyq damý mınıstrligi memlekettik mekemelerdiń jumysyn BAQ arqyly baǵalaýdy kózdep otyr. Vedomstvo basshysy Asqar Ýmarov mınıstrliktiń keńeıtilgen alqa májilisinde osyndaı josparyn bólisti, dep habarlaıdy Almaty-akshamy.kz QazAqparatqa silteme jasap.
«Jalpy, bıyl da aldymyzda memlekettiń aqparattyq jumys sapasyn, qazaqstandyq BAQ-tyń básekege qabiletin odan ári damytý mindeti tur. Memleket basshysynyń tapsyrmasyna sáıkes, Úkimettiń aqparattyq jumysynyń deńgeıin aıtarlyqtaı kóterý qajet. Osyǵan baılanysty memlekettik mekemelerdiń jumysyn BAQ arqyly baǵalaý kózdelip otyr. Bıyl BAQ salasyn damytýdy BAQ jáne úkimettik emes uıym ókilderimen keńinen talqylamaqpyz. Bul jumys Aqparat salasyn damytýdyń 2023-2025 jyldarǵa arnalǵan Ulttyq jospar sheńberinde júrgiziledi», - dedi mınıstr.
Sondaı-aq ol 2022-2023 jyldarǵa arnalǵan jýrnalıserdi oqytý jónindegi arnaıy jospary qolǵa alynatynyn atady. Aıtýynsha, bul medıa mamandardyń biliktiligin damytýǵa, halyqtyń medıa jáne aqparattyq saýattylyǵyn qalyptastyrýǵa baǵyttalǵan.
«Qazaqstandyq ınternet-segmentin damytý bıylǵy basym baǵyttardyń biri bolyp qala beredi. Qazaq tilindegi ınternet-resýrstardy, mýltımedıalyq kontentti jáne onlaın-platformalardy damytý qajet. Turǵyndardyń medıa saýatyn arttyrý úshin úkimettik emes uıymdarmen birlesip medıa jáne aqparattyq saýattylyq aptasyn ótkizýdi josparladp otyrmyz. Sonymen qatar, memlekettik telearnalardy jetildirýdiń jańa tásilderin ázirledik. Máselen, bıyl «24 KZ» memlekettik telearnasy jańa formatta jumys isteýdi bastap otyr. Bul memlekettiń aqparat saıasatty tıimdi ári sapaly júzege asyrýǵa múmkindik beredi. Oǵan qosa, memlekettik aqparattyq tapsyrys mehanızmderi jetildiriletin bolady», - dedi vedomstvo basshysy.