Memlekettik feldegerlik qyzmet ókilderi ózderiniń kásibı merekelerin atap ótti, dep habarlaıdy Almaty-akshamy.kz Polisia.kz silteme jasap.
Qazaqstan Respýblıkasynyń Memlekettik feldegerlik qyzmeti 1991 jyly Úkimet qaýlysymen quryldy.
Bul qyzmettiń basty mindeti – asa mańyzdy jáne qupıa hat-habarlardy jetkizý, sondaı-aq, basqa memleketterdiń feldegerlik qyzmetterimen ózara baılanysta bolý. Feldegerler memlekettik mekemelerdiń, joǵary bılik pen basqarý organdarynyń jáne joǵary áskerı qolbasshylyqtyń qujattaryn jetkizedi.
Mereke kúni feldegerlik qyzmettiń qyzmetkerleri men ardagerleri marapattaldy. Saltanatty sharaǵa Prezıdent Ákimshiliginiń, Premer-Mınıstr keńsesiniń, Ulttyq qaýipsizdik komıtetiniń jáne İshki ister mınıstrliginiń ókilderi qatysty.
Kópshilik feldeger mamandyǵynyń bar ekenin, onyń qyr-syry nede ekenin túsine bermeıdi. Soǵan qaramastan, memlekettik mańyzy bar hat-habarlardy jetkizý – bul kóptegen daǵdylar men úlken jaýapkershilikti qajet etetin qyzmet ekenin uǵý qıyn emes.
Ataýly kúnde marapattalǵandardyń biriniń aıtýynsha, feldegerlik qyzmet qyzmetkerleri ózin-ózi qorǵaý daǵdylaryna ıe bolýy kerek, atys qarýyn qoldana bilýi qajet jáne shabýyl bolǵan jaǵdaıda ózine júktelgen habardy nemese qujatty kez kelgen jolmen qorǵaýǵa daıyn bolýy shart.
“Bul qyzmette adam psıhologıalyq sıpattaǵy qasıetterge ıe bolýy kerek. Sonymen qatar bilimdi jáne zańdy jaqsy meńgergen bolýy qajet. Fızıkalyq kórsetkishter de óte mańyzdy. Nege deseńiz, biz asa mańyzdy qujattarmen jumys isteımiz. Bizge senip tapsyrylǵan qujat avtomatty túrde tıisti adamnyń qolyna jetýi qajet. Qyzmet barysynda ártúrli jaǵdaılar kezdesýi múmkin, soǵan daıyn bolý kerek”, – dep atap ótti Túrkistan qalasy MFQ bastyǵy Saparǵalı Sábıtov.