Bul týraly Premer-Mınıstrdiń orynbasary Altaı Kólginov aıtty.
Ol mádenıet salasyn damytýda kınoındýstrıanyń áleýeti zor ekenin tilge tıek etti, dep habarlaıdy Almaty-akshamy.kz QazAqparatqa silteme jasap.
Sebebi, halyq arasynda tartymdylyǵyna baılanysty, kıno – memlekettik mádenıet saıasatyn iske asyrýdyń pármendi quraly.
«Bizge kınonyń basty kórermeni sanalatyn jastar arasynda otansúıgishtikti, eńbekqorlyqty, otbasylyq qundylyqtardy, jaýapkershilikti, salaýatty ómir saltyn, bilim alýdy nasıhattaıtyn tartymdy kartınalar kerek. Mınıstrlik memlekettik búdjet esebinen túsiriletin fılmderdiń osy talaptarǵa sáıkes bolýyn qatań baqylaýǵa alýy kerek», - dedi A. Kólginov Mádenıet mınıstrliginiń alqa májilisinde.
Sonymen qatar, ol basqa da komersıalyq jobalardyń qoǵamdyq normalarǵa qaıshy bolmaýy mınıstrliktiń nazarynda bolýy tıis ekenin tapsyrdy.
«Qazir kórermen talǵamynyń óskenin baıqap otyrmyz. Sondyqtan, fılmderdi kórermen pikirin eskere otyryp, memlekettik búdjetten qarjylandyrý mehanızmin oılastyrý qajet. Bul rette fılmder monıtorıńiniń biryńǵaı aqparattyq júıesin iske qosý mańyzdy. Osy aqparattyq júıe arqyly árbir fılmniń prokatyn onlaın-rejımde qadaǵalaýǵa múmkindik týady. Mundaı aqparattyq júıe kıno salasynyń damýyna óte qajet. Bul otandyq kıno naryǵyn damytýǵa oń áserin tıgizetin bolady», - dedi Úkimet basshysynyń orynbasary.
Osy oraıda, ol fılmderdi memlekettik tilde dýblájdaý máselesine arnaıy toqtaldy.
«Mınıstrlik úzdik fılmderdi qazaq tiline aýdarý máselesin qolǵa alýy tıis. Jastar jáne balalar qyzyǵa tamashalaıtyn fılmderdiń qazaqshalanýy memlekettik tildiń qoldanys aıasyn keńeıtýge oń áserin tıgizetin bolady. Jalpy, kınoóndiris salasyn damytýda tıisti qaýymdystyqtarmen birlesken jumysty jandandyrý kerek. Osy oraıda, Memleket basshysy «Qazaqfılm» ulttyq kınostýdıasyn qazirgi zamanǵa saı modernızasıalaýdy tapsyrdy. Bul baǵytta naqty josparlar jasalǵan, ony taǵy da pysyqtap, tıanaqty iske asyrýdy suraımyn», - dedi Altaı Kólginov.