Ranking.kz kompanıasy óńir ákimderiniń jasy men olardyń osy qyzmette otyrǵan ýaqytyna zertteý júrgizdi.
Bıylǵy 17 qańtardaǵy jaǵdaı boıynsha, QR óńirleri ákimderiniń ortasha jasy 52,7 jasty qurady, dep habarlaıdy Almaty-akshamy.kz.
Elimizdiń eń kári ákimi Danıal Ahmetov Shyǵys Qazaqstan oblysyn basqarady. Ákimniń jasy – 68,6-da. Ekinshi jáne úshinshi orynda jańadan qurylǵan Jetisý oblysyn basqaryp otyrǵan Beıbit Isabaev (60,1 jasta) pen Aqtóbe oblysynyń ákimi Eraly Toǵjanov (59,7 jasta).
Eń jas óńir ákimi – Murat Áıtenov (41,2 jasta), ol respýblıkalyq mańyzy bar Shymkent qalasyn basqarady. Jas ákimderdiń qatarynda sonymen qatar Atyraý oblysynyń ákimi Serik Shápkenov (43,5 jas) pen Pavlodar oblysynyń ákimi Asaıyn Baıhanov (44,1 jas) ta bar.
Elimizdegi eń jas ákim Murat Áıtenov 38 jasynda qyzmetke kirisken. Bul ákimderdiń qyzmetke kirisken ýaqyttaǵy jastarynyń ishinde de eń jasy. Áıtenovtiń óńir basshysy laýazymyndaǵy qyzmet merzimi 3 jyl. Atyraý jáne Pavlodar oblystarynyń ákimderi de qyzmetke kirisken kezinde eń jas ákimderdiń qatarynda boldy: tıisinshe 42 jáne 44 jas.
Shyǵys Qazaqstan oblysyn basqaryp otyrǵan Danıal Ahmetov bul qyzmette 8,2 jyl (eń uzaq merzim) qyzmet etti. Ol oblys ákimi qyzmetine 60 jasynda kiristi.
Qazirgi qyzmetinde eń az ýaqyt otyrǵan ákim – Astana ákimi Jeńis Qasymbek pen Qaraǵandy oblysynyń ákimi Ermaǵanbet Bólekpaev. Eki ákim de jaqynda – 2022 jyldyń 8 jeltoqsanynda, bir aıdan sál astam ýaqyt buryn ǵana qyzmetine kiristi.