Memleketimizdiń órkendeýi aımaqtardyń qýatty bolýyna tikeleı baılanysty. Bul týraly QR Prezıdenti Qasym-Jomart Toqaev Qazaqstan halqyna Joldaýynda aıtty, dep habarlaıdy Almaty-akshamy.kz QazAqparatqa silteme jasap.
«Qazir Qazaqstan damýdyń jańa kezeńine qadam basty. Áleýmettik, ekonomıkalyq jáne demografıalyq ahýal múlde basqa. Búgingi syn-qaterler de, mindetter de bólek. Memleketimizdiń órkendeýi aımaqtardyń qýatty bolýyna tikeleı baılanysty. Bul máselege 2019 jylǵy Joldaýymda keńirek toqtaldym. «Qýatty óńirler - qýatty el» degen ustanym ózekti. Osy oraıda elimizdegi ákimshilik-aýmaqtyq qurylymnyń ońtaıly bolýy óte mańyzdy», - dedi Memleket basshysy.
QR Prezıdenti buǵan deıin Shymkenttiń respýblıkalyq qalaǵa aınalǵanyn, oblys ortalyǵy Túrkistan qalasyna kóshirilgenin atap ótti.
«Sonymen birge Ońtústik Qazaqstan oblysy Túrkistan oblysy dep ataldy. Bul qaı jaǵynan alsaq da durys boldy. Ony halyq óte jyly qabyldady. Men «Táýelsizdik bárinen qymbat» atty maqalamda osy úrdistiń jalǵasatynyn aıtqan edim. Sodan beri azamattarymyzdan kóptegen usynys kelip tústi. Meniń tapsyrmam boıynsha onyń bári muqıat zerdelendi», - dedi Qasym-Jomart Toqaev.