Almatylyq Danıar Býksýkbaev «Bıznestiń jol kartasy–2025» baǵdarlamasy sheńberinde kosmetıka óndirisi boıynsha 5 mln. teńge kóleminde ınovasıalyq grant utyp aldy. Oǵan grant alǵanǵa deıin «Qoldaý» kásipkerlik ortalyǵy qoldaý kórsetken bolatyn.
Danıardyń bul salada jumys istep jatqanyna 5 jyl. Iá, kóp ýaqyt emes. Biraq alǵa jyljý bar. Shyny kerek, qazir sórelerde shet eldiń kosmetıkalyq ónimderi samsap tur. Tipti, qaısysy paıdaly, al qaısysy zıan ekenin bilip, aıyryp jatpaımyz da.
– Kelinshegim bosanǵannan keıin de betindegi daqtardan aryla almady. Ol túrli kosmetıkalyq jaqpamaılardy satyp alyp paıdalana bastady. Biraq eshqaısysy kómektespedi. Tipti, keıbir kosmetıkalyq zattar alergıalyq reaksıa berdi. Óıtkeni, kóbiniń quramynda hımıalyq qospalar kóp, – deıdi ol.
Sóıtip, zaıyby Oksanamen birge krem jasap kórsek qaıtedi degen sheshimge kelip, óz betterinshe izdenip, nátıjesinde óz úıinde krem jasap shyǵaryp, úsh aıdyń ishinde bettegi pıgmentasıany ketirgen. Bul týraly qulaǵdar bolǵan jaqyn-jýyqtary men dostary «sıqyrly» krem týraly estip, tapsyrys bere bastaıdy. Sóıtip, erli-zaıypty ózgeshe kásipti, ıaǵnı sapaly kosmetıka shyǵarýdy qolǵa alady. Shaǵyn ǵana LORIEN tarıhy osylaı bastaý alǵan bolatyn.
Iá, qazir olardyń shash, bet jáne dene terisine kútim jasaýǵa arnalǵan joǵary sapaly kosmetıkalar shyǵaratyn óz óndirisi bar. Ónimderi «Parfúmerlik-kosmetıkalyq ónimniń qaýipsizdigi týraly» KO TR 009/2011 talaptaryna sáıkes zerthanada júrgiziledi.
– Ónimderdiń quramy Reseı men Eýropanyń kosmetıkalyq hımıa salasyndaǵy eń myqty mamandarynyń kómegimen jasalady. Ónimdi ázirleýde biz bet pen deneniń, sondaı-aq shashtyń terisindegi problemalardy sheshýge tek ǵylymı tásildi qoldanamyz. Assortıment áli úlken bolmasa da, bizdiń ár ónimimiz - ǵylym men ónerdiń erekshe týyndysy. Tek AQSH pen Japonıada analogtary bar, álemdegi pıgmentasıaǵa qarsy kúres boıynsha eń tıimdi quraldardyń biri bolyp tabylatyn traneksam qyshqyly qosylǵan aǵartqysh kremimizdiń ózi bizdiń maqtanyshymyz, – deıdi Danıar Býksýkbaev.
Búgingi tańda LORIEN assortımentinde ónimniń 22 ataýy bar, olar kremder, bálzamdar, sarysýlar, tonıkter, skrabtar, jýynýǵa arnalǵan kóbikter, maskalar jáne ınovasıalyq sur shashqa týǵan túsin qaıtaratyn shash losóny. Danıarǵa memleketten qoldaý taýyp, arnaıy grant jeńip alýyna da dál osy losón muryndyq bolǵan bolatyn.