Qazaqstan Respýblıkasynyń oqý-aǵartý mınıstrligimen 2023 jyly «Birtutas tárbıe» baǵdarlamasy ázirlendi.
Ortalyq komýnıkasıalar qyzmetinde ótken dóńgelek ústel barysynda oqý-aǵartý vıse-mınıstri Edil Ospan baǵdarlamany júzege asyrý barysy týraly aıtty, dep habarlaıdy aqshamnews.kz.
Memleket basshysynyń tapsyrmasyna sáıkes 2024 jyly baǵdarlama «Ádiletti Qazaqstan – Adal azamat – Ozyq oıly ult» jalpyulttyq qundylyqtarǵa sáıkes jańartylyp, barlyq bilim berý uıymdaryna engizildi. Bıylǵy jyldyń 14 naýryzynda ótken IV Ulttyq quryltaıda Prezıdent quryltaı músheleriniń baǵdarlama ataýyn «Adal azamat» etip ózgertý týraly usynystaryn qoldady. Bul ataý baǵdarlamanyń qoǵamnyń tiregi bolar adal, ádil jáne jaýapkershiligi joǵary azamattardy tárbıeleý jónindegi negizgi maqsatyn aıqyndaıdy.
Baǵdarlamany iske asyrýdyń eki jyly ishinde bilim berý uıymdarynda alty negizgi baǵyt pen 77 qadamdy qamtıtyn bilim berýdiń biryńǵaı ekojúıesin qurýǵa, sonymen qatar synyp jetekshilerin, ata-analardy, psıhologıalyq qyzmetterdi qosa alǵanda, qatysýshylardyń keń aýqymyn tartýǵa qol jetkizildi.
«Qundylyqtardy bala boıyna sińirý olardyń jas erekshelikterine sáıkes tanymdyq, praktıkalyq jáne emosıonaldy komponentterdi qamtý arqyly júrgiziledi. Tanymdyq komponent árbir qundylyqtyń máni men mazmunyn uǵynýǵa, praktıkalyq – olardy is júzinde naqty áreketter arqyly iske asyrýyna kómektesedi, al emosıonaldy – bul qundylyqtardy ómirlik ádetke, kúndelikti daǵdyǵa aınaldyrady», – dep atap ótti oqý-aǵartý vıse-mınıstri Edil Ospan.
Baǵdarlama aıasynda mektepterde Ata-analardy pedagogıkalyq qoldaý ortalyqtary, sondaı-aq óńirlerde Psıhologıalyq qoldaý ortalyqtary ashylyp, qyzmet kórsetýde. Basym baǵyt retinde – óskeleń urpaqtyń basty tálimgerleri men tárbıeshileri bolyp tabylatyn synyp jetekshileriniń róli kúsheıtilýde.
Sonymen qatar jalpyulttyq qundylyqtar oqý prosesine ıntegrasıalanǵan. Ol pán mazmunynda, synyp saǵattarynda, synyptan tys is-sharalarda kórinis taýyp, bilim berýdiń barlyq deńgeılerinde jaýapty, eńbekqor jáne adal azamat tárbıeleýge múmkindik beredi.