Memleket basshysynyń tapsyrmasyna sáıkes «Adal azamat» birtutas tárbıe baǵdarlamasy menshik túrine qaramastan, barlyq bilim berý uıymdaryna engiziledi.
Ol týraly búgin Ortalyq komýnıkasıalar qyzmetinde ótken dóńgelek ústelde oqý-aǵartý vıse-mınıstri Edil Ospan aıtty, dep habarlaıdy aqshamnews.kz Oqý-aǵartý mınıstrligine silteme jasap.
Baǵdarlamany damytý birneshe kezeńdi qamtıdy. 2025 jyly Baǵdarlama aıasynda barlyq qatysýshylardy tartyp, jekemenshik mekteptermen jumys kúsheıtiledi. 2026 jyly Baǵdarlamany qoǵamǵa keńinen taratý úshin pármendi sharalar qabyldanatyn bolady. Sondaı-aq «Adal azamat» tujyrymdamasynyń qundylyqtaryn eskere otyryp, mektepterdiń biryńǵaı dızaın-kody ázirlenedi.
«Búginde barlyq memlekettik bilim berý uıymdarynda birtutas bilim berý baǵdarlamasy sátti júzege asyrylýda. IV Ulttyq quryltaıda Memleket basshysy bul bastamanyń jalpyulttyq sıpat alýy kerektigin aıtty. Osyǵan baılanysty biz jeke bilim berý uıymdarynda tárbıe baǵdarlamasyn engizý jumysyn jalǵastyramyz. «Adal azamat» birtutas tárbıe baǵdarlamasy barlyq balalardy qamtıtyn jáne jalpyulttyq sıpattaǵy, strategıalyq máni bar uzaq merzimdi qujat», – dedi Edil Ospan.
«Adal azamat» birtutas tárbıe baǵdarlamasy tek qana bilim berý uıymdaryndaǵy ǵana emes, barlyq memlekettik uıymdardaǵy tárbıe jumysyna qatysty is-qımyldyń negizine aınalady. Oqý-aǵartý mınıstrligi bilim berý uıymdarynda memlekettik organdar júzege asyratyn is-sharalardy birtutas tárbıe baǵdarlamasy aıasynda birizdendirýdi júrgizedi. Bul tásil oqýshylardyń boıynda ulttyq jáne azamattyq qundylyqtardy damytýǵa baǵyttalǵan tárbıe jumysynyń birtutas júıesin qurýǵa múmkindik beredi.