Almaty ákimi Erbolat Dosaev Memleket basshysynyń tapsyrmasymen erlik tanytqan azamatty marapattady. Ol – 52 jastaǵy Mýsa Abdraım Saıranbaıuly, halyqaralyq áýejaıda qaýip tóndirgen qylmyskerdi toqtatyp, qyzmetkerdiń ómirin saqtap qaldy. Bul týraly Aqshamnews.kz saıty habarlaıdy.
Mýsa Abdraım Saıranbaıuly «Erligi úshin» medalimen marapattalyp, oǵan qosa, arnaıy aqshalaı syıaqy da berildi. Bul marapat onyń batyldyǵy men qaısarlyǵynyń aıqyn dáleli.
Oqıǵa halyqaralyq Almaty áýejaıynyń aldyn ala tekserý aımaǵynda oryn aldy. Qaskúnem jolaýshy keıpinde jasyryn kirip, qyzmetkerge shabýyl jasaǵan. Qarý qoldanǵan qylmyskerdi beıtaraptandyrý ońaı bolmaǵanymen, Mýsa Abdraım batyl qımyldap, ony toqtatty. Onyń áreketi bir adamnyń ǵana emes, sol sátte áýejaıda bolǵan ózge de adamdardyń qaýipsizdigin qamtamasyz etti.
Marapatty alǵannan keıin Mýsa Abdraım óziniń alǵysyn bildirdi:
"Prezıdent Qasym-Jomart Kemelulyna erekshe yqylasy men qurmeti úshin shynaıy alǵysymdy aıtamyn. Elimizde árdaıym beıbitshilik, yntymaq pen órkendeý bolsyn!"
Bul oqıǵa qoǵamda keńinen talqylanyp, azamattyń batyldyǵy kópshiliktiń joǵary baǵasyn aldy. El Prezıdentiniń mundaı erlikti eleýsiz qaldyrmaı, marapatpen atap ótýi – Qazaqstanda batyrlyq pen jaýapkershiliktiń laıyqty qurmetke ıe ekenin kórsetedi.
Mýsa Abdraım Saıranbaıulynyń bul áreketi – naǵyz erliktiń úlgisi. Ol tek bir adamnyń ǵana emes, tutas qoǵamnyń qaýipsizdigi úshin batyldyq tanytty. Mundaı oqıǵalar batyrlyqtyń tek kitap betterinde ǵana emes, ómirde de bar ekenin dáleldeıdi.