Qazaqstanda jasandy ıntellekt týraly qazaq tilinde jazylǵan alǵashqy kitaptyń tusaýkeseri ótpek. «Jasandy ıntellekt álippesi» atty eńbektiń tanystyrylymy 11 naýryz kúni Almaty qalasyndaǵy Smart Point ortalyǵynda (Smart Space zaly, Baızaqov kóshesi, 280) saǵat 14:00-de ótedi. Bul týraly Aqshamnews.kz saıty habarlaıdy.
Kitaptyń tanystyrylymynda jasandy ıntellekt (JI) tehnologıalarynyń mańyzy, bolashaǵy jáne Qazaqstandaǵy damý perspektıvalary jan-jaqty talqylanady. Sonymen qatar, IT, kıberqaýipsizdik, bıotehnologıalar sıaqty zamanaýı salalar boıynsha pikir almasý ótedi.
Kitap avtory Meıirjan Áýelhanuly bul eńbek qazaq oqyrmandaryna JI álemin tereńirek túsinýge kómektesetinin atap ótti:
"Bul kitap – jasandy ıntellektke qyzyǵatyn kez kelgen adam úshin paıdaly qural. Munda teorıalyq málimettermen qatar, naqty tájirıbelik qoldaný múmkindikteri de qamtylǵan", – dedi ol.
Belgili jýrnalıs Qaınar Oljaı kitaptyń mazmuny men qurylymyna joǵary baǵa berip:
"Qazaq tilinde jasandy ıntellekt týraly sapaly aqparat alý qıyn. Bul kitap – osy olqylyqtyń ornyn toltyratyn qundy eńbek. Munda JI ónimderin usynatyn kompanıalar, negizgi termınder men praktıkalyq tapsyrmalar qamtylǵan", – dep atap ótti.
2024 jyly álemdik JI naryǵynyń quny 190 mıllıard dollardan asty. Qazaqstan da bul salanyń damýyna úles qosyp, JI-di óndiris, medısına, qarjy, bilim berý salalarynda belsendi túrde engizýde.
Osy baǵytta bilimdi damytýdy maqsat etken AI-Hub Publishing baspasy qurylyp, qazaq tilinde JI, IT, kıberqaýipsizdik, bıotehnologıalar taqyryptarynda ǵylymı-kópshilik eńbekterdi shyǵarýdy josparlap otyr.
«Jasandy ıntellekt álippesi» kitaby – qazaq oqyrmandary úshin jańa tehnologıalardy meńgerýge arnalǵan alǵashqy tolyqqandy eńbek. Tusaýkeser jasandy ıntellektke qyzyǵatyn barlyq mamandar men stýdentter úshin mańyzdy shara bolmaq.
Baılanys: +7 700 973 20 01