Memleket basshysy Qasym-Jomart Toqaevtyń qatysýymen ótetin Búkilarmıalyq keńestiń otyrysy bastaldy, dep habarlaıdy Almaty-akshamy.kz.
«Qarýly Kúshterimiz – memlekettigimizdiń myzǵymas tiregi. Týǵan eldiń táýelsizdigin jáne beıbit ómirin qorǵaý – qasıetti paryz. Týǵan jerdiń aýmaqtyq tutastyǵyn saqtaý – qasterli borysh. Batyr babalarymyz ǵasyrlar boıy jeriniń shetin jaýǵa bastyrmaı, bizge mıras etti. Osy uly murany kózdiń qarashyǵyndaı saqtaý – basty mindetimiz. Birtutas ári qýatty memleketti urpaqqa tabystaý – negizgi maqsatymyz. El ishi – tynysh, qoǵam – turaqty bolsa, jasampaz ári órkenıetti memleketke aınalamyz. Iaǵnı, damyǵan el bolamyz desek, eń aldymen, beıbitshilik jáne tynyshtyq kerek. Qarýly Kúshterimiz osy qasterli qundylyqtardy qorǵaýǵa tıis. Qazaqstan barlyq eldermen dostyq qatynas ornatqan. Bizdiń ustanym – aıqyn»,-dedi Memleket basshysy.
7 mamyr - QR Qarýly Kúshteriniń qurylǵan kúni qarsańynda ótetin jıyn barysynda áskerı salany damytýǵa jáne ásker daıyndyǵyna, Qazaqstan armıasyn tehnologıalyq turǵyda jańǵyrtýǵa qatysty máseleler qarastyrylady.
Qorǵanys mınıstriniń orynbasary Sultan Qamaletdınovtiń sózinshe, bıyl Qazaqstannyń áskerı búdjeti ósken.
«Qorǵanys mınıstrliginiń áskerı búdjeti qarastyrylyp, Qazaqstannyń JİÓ-degi áskerı búdjeti bir paıyz shamasynda bekitildi», - deıdi mınıstrdiń orynbasary.
Buǵan deıin Qorǵanys mınıstrligine qarasty oqý oryndary pedagogteriniń jalaqysy ósetini belgili bolǵan edi.
Naqtyraq aıtsaq, áskerı pedagogterdiń laýazymdy aılyq mólsheri:
- 2023 jylǵy 1 qańtardan bastap 2,32 mólsherinde;
- 2024 jylǵy 1 qańtardan bastap 2,74 mólsherinde;
- 2025 jylǵy 1 qańtardan bastap 3,2 mólsherinde túzetý koefısıentin qoldana otyryp aıqyndalady.
Keleshekte áskerı komandırdiń oń qorytyndysyn alǵan merzimdi áskerdegi jaýyngerlerge tegin joǵary áskerı bilim usynylýy múmkin. Qorǵanys mınıstrliginiń bul bastamasyn eldegi 70 joǵary oqý orny qoldap otyr.