Ońtústik astanada Almaty oblysy Eńbekshiqazaq aýdanynyń 65 jastaǵy turǵynyna júrektiń jasandy sol jaq qarynshasy (LVAD) ımplanttaldy.
MÁMS esebinen qarjylandyrylatyn mundaı operasıa Almatyda osymen ekinshi adamǵa jasalyp otyr. Ekinshi operasıa da sátti ótti, dep habarlaıdy Almaty-akshamy.kz.
Pasıent 2017 jyldan beri ıshemıalyq dılatasıalyq kardıomıopatıadan zardap shegedi. Sol jaq qarynshanyń shyǵarylym fraksıasy óte tómen boldy - nebári 20%, ınfarkt soqty. Aldyńǵy tómendeıtin arterıaǵa stent ornatylǵan. Sonymen qatar, júrek toqtap qalýynyń aldyn alý úshin kardıoverter-defıbrıllátor ımplanttaldy. Júrek jetkiliksizdigin dekompensasıalaýǵa baǵyttalǵan em-sharalardyń birneshe kýrsyn qabyldaǵan.
ǴZI Basqarma tóraǵasy Marat Pashımovtyń aıtýynsha, Astana Ulttyq ǵylymı kardıohırýrgıa ortalyǵynyń Basqarma tóraǵasy Mahabbat Bekbosynova jáne ortalyqtyń jetekshi mamandarynyń qatysýymen ótken konsılıýmda pasıentke LVAD ımplantyn ornatý usynyldy.
«Bıyl sáýir aıynda UǴKO basshylyǵymen bolǵan kezdesýde biz medısınalyq kómektiń qoljetimdiligi men sapasyn qamtamasyz etý úshin ózara tájirıbe, ınovasıalar jáne tehnologıalarmen almasý jumystaryn jalǵastyramyz dep kelisken edik. Bizdiń dárigerlermen birge osy kúrdeli operasıany jasaǵan Astanalyq áriptesterime alǵys aıtamyn. Operasıa Áleýmettik saqtandyrý qory esebinen júzege asyrylady jáne Qazaqstan azamattary úshin tegin», - dep atap ótti Marat Pashımov.
Kardıologıa jáne ishki aýrýlar ǴZI kardıohırýrgıa bólimshesi meńgerýshisi Rýstem Tóleýtaevtyń aıtýynsha, naýqas operasıaǵa deıin úsh ret jansaqtaý bóliminde jatty. Buǵan deıin qansha ret aýrýhanalarda jasalǵan em-dom oń nátıje bermegen.
«Buǵan deıin mundaı dıagnoz qoıylǵan naýqastar aǵzanyń rezervtik múmkindigine qaraı ómir súretin, endi olardyń ómirin uzartýǵa múmkindik bar. Qazir osyndaı apparattar álemde kóp ornatylyp jatyr. Degenmen operasıa quny qymbat bolǵandyqtan mundaı otalardy ekiniń biriniń qaltasy kótere bermeıdi», - dep túıindedi dáriger.
Implantasıadan keıin jalpy aǵzanyń jaǵdaıy jaqsarady, júrek jetkiliksizdiginiń belgileri basylady. Qazir naýqastyń jaǵdaıy edáýir jaqsarǵan: isik, entigý basyldy, uıqysy rettelgen. Demalystan keıin aýrýhanadan shyǵady.
1-7 mamyr aralyǵynda búkil álemde Halyqaralyq Júrek jetkiliksizdigi týraly habardar bolý aptalyǵy atalyp ótedi. Shara aıasynda elimizdiń barlyq emhanalarynda, kardıoortalyqtarda Ashyq esik kúnderin ótkizý josparlanǵan.
Júrek jetkiliksizdigi AQSH pen Eýropada ólim-jitimge sebepshi bolatyn aýrýlar arasynda ekinshi orynda tur. Álemde bul dertke 70 mln. astam adam shaldyqqan. Árbir besinshi naýqas dıagnoz qoıylǵannan keıin bir jyl ishinde ómirden ótedi.