Prezıdentke elimizdegi vegetasıalyq kezeń barysy jáne orman sharýashylyǵy men janýarlar álemine qatysty máseleler jóninde málimet berildi.
Qasym-Jomart Toqaevqa orman sharýashylyǵyn materıaldyq-tehnıkalyq turǵydan jabdyqtaý, sonyń ishinde tehnıka satyp alý jáne yqtımal orman órtin aldyn ala anyqtaý júıelerin ornatý boıynsha qabyldanyp jatqan sharalar jóninde baıandaldy.
Zúlfıa Súleımenova Memleket basshysyna tabıǵatty qorǵaý jáne orman sharýashylyǵy mekemelerine qajetti órtke qarsy qural-jabdyqtar men tehnıkalardyń tizimin keńeıtý úshin tıesili normalardy jańartý jumystary bastalǵanyn aıtty.
Budan bólek, Ekologıa jáne tabıǵı resýrstar mınıstri negizgi ózen baseınderindegi, ásirese, elimizdiń ońtústik aımaqtaryndaǵy sý tapshylyǵy jaǵdaıynda vegetasıalyq kezeńniń qalypty ótýi úshin qabyldanyp jatqan sharalar jóninde málimet berdi.
Kezdesý sońynda Prezıdent tabıǵatty qorǵaý bólimsheleriniń materıaldyq-tehnıkalyq bazasyn kúsheıtý isin keshendi túrde júzege asyrý mańyzdy ekenin atap ótti.
Sonymen qatar Qasym-Jomart Toqaev tabıǵatty qorǵaý zańnamasynyń buzylý faktilerin anyqtap, olardy joıý úshin quqyq qorǵaý organdarymen tyǵyz qarym-qatynasta jumys isteý qajettigine nazar aýdardy. Sondaı-aq qajet jaǵdaıda quqyq buzýshylardy qylmystyq jaýapkershilikke tartý kerek ekenin atap ótti.