Reseıdegi jaǵdaı sát saıyn qubylyp tur. Jaldamaly áskerı kompanıa «Vagner» jasaqtary Rostov qalasyn óz baqylaýyna alǵan. Ǵalamtorda «Vagner» jetekshisi Evgenıı Prıgojınniń Rostovtaǵy ońtústik áskerı shtabynyń ishinde júrgenin kórsetetin vıdeo da tarady.
Málimetterge qaraǵanda «Vagner» jasaqtarynyń qalaǵa kirýi qaqtyǵyssyz júzege asqan. Memlekettik jáne áskerı nysandardy da óz baqylaýyna ustap tur. Degenmen, Prıgojın tarabynan qaqtyǵysqa túsken áskerı tehnıkalardyń joıylǵany týraly málimetter de aıtylýda.
Internette taraǵan vıdeoda Prıgojın Reseıdiń joǵary áskerı jetekshilerin betpe-bet kelissózge shaqyrady. Eger kezdesýge kelmese óz jasaǵy qalany qorshap, Máskeýdi betke alyp alǵa jyljıtynyn aıtqan. Qazirshe, vıdeo materıaldardyń ras-ótirigi anyq emes.
Keshe keshten bergi Reseıdegi jaǵdaıdyń baıybyna jetý qıyn. Rasynda da ishki búlik pe, álde kezekti aldarqatý áreketi me degenge qazirshe senimdi jaýap joq.