Prezıdent Qasym-Jomart Toqaevtyń tóraǵalyǵymen Aqordada ótken keńeste Ulttyq banktiń byltyr atqarǵan qyzmeti týraly esep berildi, almaty-akshamy.kz
İs-sharaǵa Ulttyq bank tóraǵasy Tımýr Súleımenov, Premer-Mınıstrdiń orynbasary – Ulttyq ekonomıka mınıstri Nurlan Baıbazarov, Qarjy naryǵyn retteý jáne damytý agenttiginiń tóraǵasy Mádına Ábilqasymova, Qarjy mınıstri Mádı Takıev qatysty.
Prezıdentke 2023 jylǵy aqsha-kredıt saıasatynyń oryndalý nátıjeleri, qarjy turaqtylyǵyn jáne altyn-valúta rezerviniń jaı-kúıin qamtamasyz etý úshin Ulttyq banktiń qabyldap jatqan sharalary, sondaı-aq Ulttyq qordaǵy aktıvter týraly baıandaldy.
Memleket basshysyna ótken jyldyń qorytyndysy boıynsha ınflásıa eki eseden astam, ıaǵnı 9,8 paıyzǵa deıin tómendegeni týraly málimet berildi. Bazalyq mólsherleme 14 paıyzǵa deıin tómendegen. Depozıtterdi dollar túrinde saqtaý 23,2 paıyzdy qurap, 26 jyl burynǵy tómengi shekti deńgeıge jetti. Bul rette Ulttyq banktiń jalpy altyn-valúta rezervi 2022 jylmen salystyrǵanda bıyl 0,9 mıllıard dollarǵa nemese 2,5 paıyzǵa kóbeıip, 36 mıllıard dollardy quraǵan. Ulttyq qordaǵy aktıvter 4,3 mıllıard dollarǵa ósip, 60 mıllıard dollarǵa jetti. Aktıvterdiń tabystylyǵy 11,38 paıyz boldy. Ulttyq banktiń senimgerlik basqarýyndaǵy Biryńǵaı jınaqtaýshy zeınetaqy qorynyń zeınetaqy aktıvteriniń jıyntyq kólemi byltyr 3,2 trıllıon teńgege ulǵaıyp, 17,8 trıllıon teńgege jetken. Zeınetaqy aktıvteriniń tabystylyǵy ınflásıa deńgeıinen asyp, 10,1 paıyzdy qurady.
Qasym-Jomart Toqaevqa «Sıfrlyq teńge» jobasynyń iske asyrylý barysy jáne sıfrlandyrý máselesine qatysty mańyzdy bastamalar jaıynda aqparat berildi. Atap aıtqanda, 2023 jyly qarjy naryǵyna qatysýshylarmen birlesip, Open API platformasy men Qarjylyq alaıaqtyqqa qarsy is-qımyl jónindegi antıfrod-ortalyǵy pılottyq rejımde iske qosyldy.
Memleket basshysy álemdegi geosaıası turaqsyzdyqqa, joǵary ınflásıaǵa jáne jahandyq saýdanyń tómendeýine qaramastan, byltyr jalpy Qazaqstan úshin jaqsy jyl bolǵanyn atap ótti. Sonymen qatar qazirgi álemdik jaǵdaıda elimizdiń makroekonomıkalyq jáne qarjy turaqtylyǵyn qamtamasyz etý úshin Ulttyq bank pen Úkimet úılesimdi jumysty jalǵastyra berýi qajet.
Jıyn qorytyndysy boıynsha Prezıdent ulttyq qarjy naryǵy júrgizip otyrǵan saıasattyń tıimdiligin arttyrýǵa jáne ınfraqurylym qurýǵa qatysty birqatar mindet júktedi.