Prezıdent «Turan» jáne «Ońtústik-SHyǵys» gaz jylý stansıalarynyń, sorǵy-súzgi stansıasynyń jáne úshinshi JEO-nyń qurylys jumystarynyń barysymen tanysty, dep habarlaıdy Almaty-akshamy.kz QazAqparatqa silteme jasap.
Astana qalasynyń ákimi Jeńis Qasymbek Memleket basshysyna «Ońtústik-SHyǵys» gaz jylý stansıasynyń jáne jalpy qýaty saǵatyna 700 gıgakalorıı bolatyn «Turan» gaz jylý stansıasynyń birinshi kezeńiniń qurylystary aıaqtalǵany týraly málimet berdi. Onyń aıtýynsha, «Ońtústik-SHyǵys» stansıasy Mynjyldyq aleıasy, «Nurly jol» vokzaly, «Baǵystan» turǵyn alaby sıaqty qurylysy qarqyndy túrde júrip jatqan aýdandardy, al «Turan» stansıasy qalanyń sol jaǵalaýynda jańadan salynyp jatqan aýmaqty turaqty jylýmen qamtamasyz etedi.
Memleket basshysyna atalǵan gaz jylý stansıalary bıylǵy jylytý maýsymynyń basynan bastap iske qosylatyny jóninde baıandaldy. Jyl aıaǵyna deıin úshinshi JEO-nyń qurylysy aıaqtalady. Úsh jańa nysan qalany qosymsha jylýmen qamtamasyz etedi. Onyń qýaty – saǵatyna 1140 gıgakalorıı. «Turan» gaz jylý stansıasynyń ekinshi kezeńiniń salynýy jáne «Telman» jańa gaz jylý stansıasy qýaty saǵatyna 850 gıgakalorıı bolatyn qosymsha jylý beredi.
Qurylys kompanıasynyń ókilderi Qazaqstanda gaz jylý stansıalarynyń óndiristegi otandyq úlesin arttyrý úshin gaz jabdyqtaryn óndirýshi kásiporynmen arada ýaǵdalastyqtar bar ekenin jetkizdi.
Prezıdent gaz jylý stansıalaryn kezeń-kezeńmen paıdalanýǵa berýdi tapsyrdy.
«Eń aldymen, jobalardyń sapasy joǵary bolýǵa tıis. Biz ony qadaǵalaımyz. Mundaı jobalar qalaǵa óte qajet. Men bul jerge osy maqsatpen keldim. Ár qalada úsh negizgi másele bar. Olar – jylý, jaryq jáne sý. Turǵyndar bul qajettiliktermen mindetti túrde qamtamasyz etilýi kerek. Onyń ústine, sóz elorda týraly bolyp otyr. Eshqandaı kidiris bolmaýǵa tıis. Bul, túptep kelgende, bizdiń memleketimizdiń bedeli men ımıjine qatysty másele. Sondyqtan atalǵan máseleni bárimiz jumylyp, mindetti túrde tolyq sheshýimiz qajet», – dedi Memleket basshysy.
Jeńis Qasymbek Prezıdentke Astana sý qoımasynan tartylatyn sý qubyrynyń jáne sorǵy-súzgi stansıasynyń iske qosylýy jóninde aıtty. Onyń málimeti boıynsha bıylǵy qarashada Nura jerasty sý kózinen qýaty 48 myń tekshe metr bolatyn sý qubyryn tartý, sondaı-aq «Telman» sorǵy stansıasynyń qýatyn kúnine 160 myń tekshe metrge deıin jetkizý jónindegi jobalaý jumystary aıaqtalady.
Qasym-Jomart Toqaev elorda halqynyń sany jyldan-jylǵa kóbeıip kele jatqanyna baılanysty qosymsha sý kózderimen qamtamasyz etý joldaryn izdeý qajettigine nazar aýdardy. Sondaı-aq qaladaǵy jańa jylý nysandarynyń qurylysyn ýaqtyly aıaqtaýdy tapsyrdy.