Bul týraly Úkimet jáne UQK basshysynyń atyna saýal joldaǵan depýtat Ermurat Bápı aıtty.
Májilis depýtaty óziniń depýtattyq saýalynda Atyraý, Aqtóbe, Mańǵystaý, Ulytaý, Almaty óńirin ýahabshylar – salafızm ıdeıasyna tabynýshylar basyp bara jatqanyn aıtty, dep habarlaıdy Almaty-akshamy.kz
Onyń aıtýynsha, teris baǵyttyń damýyna keńinen múmkindik berip, jan-jaqty jaǵdaı jasap otyrǵan jergilikti bılik ókilderi bar.
Úkimet basshysynyń jáne UQK basshysynyń atyna joldaǵan depýtattyq saýalynda májilismen úlken qalalarda mektep salatyn qýys qalmasa da, meshit pen hram salatyn jer tabylyp jatqanyna tańdanysyn jasyrmady.
“Sońǵy birer jylda Islam dinin jamylǵan jat aǵymdar qazaqstandyq qoǵamǵa áleýmettik-turmystyq jarqyshaq salyp, ol sańylaý barǵan saıyn ajyrap barady. Tipti, qoǵamnyń shyrqyn buzyp, memlekettik tutastyqqa aýyz sala bastaǵan jarqyshaq qazaq halqynyń ulttyq birligi men ulttyq damý dástúrine jáne myńjyldyq qazaqı ıslam saltyna qarsy shabýylǵa aınalǵan syńaı tanytady. Bul teris dinı úrdis saıası sıpat alyp bara jatqan joq pa degen de qater bar. Sebebi halyqtyń kemshin dinı bilim-tanymyn paıdalanǵan teris dinı top jantalasyp, qoǵamǵa jalǵan rýhanı qundylyqtar men bóten dástúrlerdi sińirý qamyn jasaýda”, – deıdi Ermurat Bápı.
Depýtattyń pikirinshe, Rınat Zaıytovtyń azamattyq pikirine qarsy shabýyldar osyndaı saıası qaterdiń sıpatyn sezdiredi.
“Qoǵamdy arabtyq-ýahabtyq dinı ustanym negizde bólshekteýge baǵyttalǵan bul áreketterge bizder – depýtattar jaıbaraqat qarap otyra almaımyz! Biz myńjyldyq dombyrany haram qylýǵa jol bermeımiz! Bul áreketter eldiń ulttyq qundylyqtar júıesi men rýhanı negizine jasalyp jatqan shabýyl dep túsiný kerek! Bir ókinishtisi – bul ıslamdyq sekta Qazaqstannyń biraz aımaǵynda: ásirese Atyraý, Aqtóbe, Mańǵystaý, Ulytaý, Almaty óńirinde etek jaıyp barady. Bul óńirlerdiń shaǵyn bıznesin, ásirese bazar saýdasy tóńiregin ýahabshylar – salafızm ıdeıasyna tabynýshylar basyp barady. Iaǵnı, teris sektanyń damýyna keńinen múmkindik berip, jan-jaqty jaǵdaı jasap otyrǵan jergilikti bılik ókilderi bar degen sóz”, – dep paıymdaıdy ol.
Ermurat Bápı memlekettik bıliktiń óz ishinde de ýahabızm men jat aǵymdardy nasıhattaýdy qoldaıtyn joǵary laýazymdy memlekettik qyzmetkerler bar degen derek estigenin aıtty.
“Eger osy sóz qańqý emes, naqty jaǵdaı osylaı bolsa, onda bizdiń táýelsiz memlekettigimizge shynynda da qater tóngeni. Iá, órkenıet kóshine ergen bizdiń el adam quqyǵyn qadirleıdi. Bul – demokratıalyq prınsıpterdiń basty qaǵıdasy. Biraq sol erkin quqyq bas bermeı ketip, bizdiń ulttyq jáne memlekettik dińimizdi shaıqalta bastasa, biz buǵan kózjumbaılyqpen qaraýǵa qaqymyz joq! El Konstıtýsıasynyń talaby boıynsha, memlekettiń zaıyrly damý bolashaǵyn áldebir kúshterdiń ıemdenip ketýine jol bermeýimiz kerek!”, – dedi depýtat.
Májilismen endigi jerde «memleket – dinnen bólek» nemese «din – memleketten bólek» dep, syrttaı baqylaýshy bolyp, samarqaý otyrýǵa bolmaıtynyn atap ótti.
“Osy oraıda Májilis depýtattarynyń sizge joldaıtyn birneshe saýaly bar. Birinshiden, Siz jáne Sizdiń Kabınetińiz qalyptasqan kúrdeli jaǵdaıdy túısinip otyr ma? Qoǵamnyń dinı negizde bólshektený qaýpine qarsy is-qımyl jospary bar ma? Ekinshiden, Úkimet pen Ulttyq Qaýipsizdik Komıteti jáne ýákiletti organdar birlesip, teris dinı aǵymdar týdyryp jatqan ulttyq alaýyzdyqty shuǵyl toqtatýdyń amal-áreketteri El Prezıdentiniń nazaryna usynyldy ma? Úshinshiden, budan 12 jyl buryn – 2011 jyldyń 11 qazanynda qabyldanǵan «Dinı qyzmet jáne dinı birlestikter týraly» zańǵa tıisti ózgerister men tolyqtyrýlar engizýdiń qoǵamdyq qajettiligin kóteretin kez kelgen joq pa? Tórtinshiden, qalyptasqan osy qoǵamdyq jaǵdaıda biz barlyq kúsh-jigerimizdi biriktirip, ult birligi men memlekettiń turaqty damý jaǵdaıyn saqtaýǵa Úkimet pen Parlament múddeli bolýy kerek dep esepteımiz”, – dep túıindedi sózin.