Memleket basshysy SINOPEC kompanıasy dırektorlar keńesiniń tóraǵasy Ma Iýnshendi qabyldady
Áńgimelesý barysynda ózara yntymaqtastyq jáne munaı-gaz hımıasy men energetıka salalaryndaǵy birlesken ınvestısıalyq jobalardy júzege asyrý perspektıvalary talqylandy, dep habarlaıdy almaty-akshamy.kz.
Qasym-Jomart Toqaev SINOPEC kompanıasynyń polıetılen óndirisi jobasyna tolyqqandy seriktes retinde qatysýy Qazaqstannyń atalǵan kásiporynmen ornyqty yqpaldastyǵynyń aıqyn dáleli ekenin atap ótti. Qazaqstan munaı-gaz hımıasyna qatysty álemdik deńgeıdegi mundaı aýqymdy jobany buǵan deıin júzege asyrmaǵan. Jobanyń jalpy quny – 7,7 mıllıard dollar.
– Biz kompanıanyń Qazaqstan men Qytaı arasyndaǵy ekijaqty qarym-qatynasty damytýǵa, sondaı-aq elimizdiń munaı-gaz salasyna qosqan úlesin joǵary baǵalaımyz. Sizdiń kásipornyńyzben yntymaqtastyqty nyǵaıtýǵa múddelimiz ári Sizdiń kompanıany Qazaqstannyń strategıalyq seriktesi dep sanaımyz, – dedi Memleket basshysy.
Óz kezeginde Ma Iýnshen Memleket basshysyna kompanıanyń 2024 jyldyń ekinshi jartysynda zaýyt qurylysyn bastaýǵa nıettenip otyrǵanyn aıtty. Sondaı-aq Atyraý munaı óńdeý zaýytynyń bazasynda taǵy bir strategıalyq jobany júzege asyrý – tereftal qyshqyly men polıetılentereftalat óndirisi keshenin salý josparyn jetkizdi.
– Biz osy jobanynyń damýyna úlesimizdi qosqymyz keledi. Bul jobaǵa aıryqsha mán beremiz, – dedi Ma Iýnshen.
Budan bólek, kezdesýde geologıalyq barlaý jáne jer qoınaýyn paıdalaný, sondaı-aq atalǵan baǵytta zamanaýı tehnologıalardy qoldanýǵa qatysty yntymaqtastyq máseleleri qarastyryldy.
Munan keıin Memleket basshysy CITIC Group kompanıasynyń basqarma tóraǵasy Chjý Hesındi qabyldady.
Áńgimelesý barysynda energetıka, munaı hımıasy ónerkásibi jáne basqa da mańyzdy salalardaǵy ózara seriktestikti nyǵaıtý máseleleri talqylandy. Prezıdentke CITIC Group kompanıasy men Qazaqstannyń buǵan deıin qol jetkizgen ýaǵdalastyqtarynyń júzege asyrylý barysy týraly málimet berildi.
– Bizdiń turaqty kezdesýlerimiz aradaǵy yntymaqtastyqtyń strategıalyq sıpatyn bildiredi. Bıyl mamyr aıynda CITIC Construction kompanıasy qazaqstandyq seriktesterimen jalpy ınvestısıa kólemi 2 mıllıard dollar bolatyn jobalardy iske asyrý jónindegi 5 qujatqa qol qoıdy. Mańyzdy jobalardyń biri – Aqtaýdaǵy Caspi Bitum zaýytynyń munaı óńdeý qýatyn jylyna 1,5 mıllıon tonnaǵa deıin jetkizý. Maǵan «QazMunaıGaz» ben CITIC Group arasynda tıisti kelisimge qol qoıylǵany jóninde málimet berildi. Qurylys salasynda mol tájirıbeńiz bar ekenin eskersek, bul joba sapaly ári qysqa merzim ishinde júzege asyrylady dep oılaımyn, – dedi Memleket basshysy.
CITIC basqarma tóraǵasy Qazaqstan tarapymen ózara tıimdi yntymaqtastyqty joǵary baǵalady.
– Bizdiń SITIC korporasıasy Qazaqstanda tabysty jumys istep jatyr. Maǵan jáne meniń áriptesterime búgin sizben júzdesý – zor mártebe. Bizdiń qyzmetimizdiń negizgi maqsaty – Qazaqstanmen aradaǵy yntymaqtastyqty nyǵaıtý, – dedi Chjý Hesın.
Budan bólek, kezdesý barysynda ınvestısıa jáne agroónerkásip kesheni salalaryndaǵy yntymaqtastyq perspektıvalary qarastyryldy