Prezıdent Qasym-Jomart Toqaev QHR Memlekettik keńesiniń Premeri Lı Sánmen kezdesti
Kezdesý barysynda Qazaqstan men Qytaı arasyndaǵy jan-jaqty strategıalyq seriktestiktiń jaı-kúıi jáne ony damytý perspektıvasy talqylandy. Sondaı-aq Qasym-Jomart Toqaev pen QHR Tóraǵasy Sı Szınpınniń buǵan deıingi kezdesýlerinde qol jetkizilgen ýaǵdalastyqtardy júzege asyrýǵa basa nazar aýdaryldy, dep habarlaıdy almaty-akshamy.kz.
Qazaqstan Prezıdenti Qytaıdyń qarqyndy áleýmettik-ekonomıkalyq damýyn erekshe yqylaspen baqylap otyrǵanyn atap ótti.
– QHR Úkimeti álemdi turaqsyzdyq jaılap turǵan qazirgi kezeńde ekonomıkanyń ornyqtylyǵyn qamtamasyz etýge qatysty mańyzdy máseleni tıimdi sheship otyr. Qytaıdyń jahandyq ekonomıkanyń ornyqty damýyna qosqan eleýli úlesin joǵary baǵalaımyz. Qazaqstan Qytaımen dostyq, tatý kórshilik qarym-qatynasty jáne jan-jaqty strategıalyq yntymaqtastyqty nyǵaıtýǵa qashanda erekshe mán beredi. Qazaqstan QHR-dyń senimdi strategıalyq seriktesi ári tatý kórshisi boldy keldi jáne keleshekte de solaı bolyp qala beredi. Búginde qazaq-qytaı qatynasy qarqyndy damyp jatyr. Buǵan joǵary deńgeıdegi belsendi saıası dıalog, sondaı-aq eki el úkimetteriniń úılesimdi jumysy yqpal etýde, – dedi Qasym-Jomart Toqaev. Memleket basshysy búgin QHR Tóraǵasy Sı Szınpınmen óte tabysty kelissóz júrgizgenin atap ótti. Kópjaqty qazaq-qytaı qatynasyn odan ári nyǵaıtý úshin naqty ýaǵdalastyqtarǵa qol jetkizildi. – Saparymnyń aıasynda búgin Úkimet deńgeıindegi 9 qujatqa, eki eldiń bıznes jáne basqa da qurylymdarymen 20-dan astam kelisimge qol qoıyldy. Qytaıdaǵy Qazaqstan týrızmi jyly aıasynda vızasyz rejımge jáne Transkaspıı halyqaralyq kólik baǵdaryn damytýǵa, sondaı-aq energetıka salasyndaǵy ózara yqpaldastyǵymyzǵa qatysty kelisimderdiń mańyzy zor ekenin atap ótkim keledi, – dedi Prezıdent.
Lı Sán ekijaqty baılanystardy odan ári nyǵaıtý turǵysynan Qasym-Jomart Toqaevtyń QHR-ǵa jasaǵan saparynyń mańyzdylyǵyna toqtaldy
– Qazaqstan men Qytaı halyqtaryn ǵasyrlar boıǵy dostyq qatynastar biriktiredi. Bıyl mamyr aıynda Qytaı teledıdaryna bergen suhbatyńyzda Siz bizdiń elimizde bilim alǵan jáne jumys istegen kezdegi estelikterińizben bólisip, qytaı tilin jetik biletin adam retinde bizdiń aýdıtorıamyzdy baýrap aldyńyz. Men de suhbatty kórdim. Bul elderimiz arasyndaǵy dostyqty nyǵaıtýǵa tyń serpin berdi dep oılaımyn. Sizdiń Tóraǵa Sımen kezdesýińizdiń qorytyndysy boıynsha mańyzdy ýaǵdalastyqtarǵa qol jetkizildi. Olar memleketterimiz arasyndaǵy qarym-qatynastyń jańa «altyn 30 jyldyǵy» kezeńine baǵyt-baǵdar beredi. Qytaı tarapy áriptesterińizben birge joǵary deńgeıde qol jetkizilgen osy ýaǵdalastyqtardy júzege asyrýǵa, ǵasyrlar boıǵy dostyq baılanystar men ózara tıimdi yntymaqtastyqty nyǵaıtýǵa daıyn, – dedi Lı Sán.
Kezdesý barysynda aýyl sharýashylyǵy, ınvestısıa, kólik jáne tranzıt, energetıka, munaı-gaz hımıasy, geologıalyq barlaý, avtokólik qurastyrý, joǵary tehnologıa, sıfrlandyrý salalaryndaǵy ózara yqpaldastyqty nyǵaıtý máseleleri qarastyryldy. Sonymen qatar Qasym-Jomart Toqaev pen Lı Sán transshekaralyq ózenderdi birlesip paıdalaný jónindegi yntymaqtastyqty jalǵastyrýǵa ózara beıildi ekenin rastady.