Tóreǵalı Tóreáli áleýmettik jelide óziniń kóshe sypyryp júrgen vıdeosyn jarıalady
Polıseılerdi balaǵattaǵany úshin 40 saǵattyq qoǵamdyq jumysqa tartylǵan belgili ánshi Tóreǵalı Tóreáli áleýmettik jelide óziniń kóshe sypyryp júrgen vıdeosyn jarıalap, sot úkimin oryndap júrgenin aıtty.
«Sottyń sheshimi boıynsha, 40 saǵattyq qoǵamdyq jumys tapsyrǵan bolatyn. Túske deıin saıabaqta boldyq. Endi osy jerdi tazalap jatyrmyz. Bul meniń táýelsiz otanym, táýelsiz elim, táýelsiz jerim, táýelsiz Qazaqstanym. Álbette, ánurany, kók týy bar eldiń mindetti túrde zańy bolady. Ol zańnyń aldynda barlyǵymyz birdeımiz. Oǵan baǵynýymyz kerek. Mine, uly dala balasy uly dalany sypyryp jatyr. Munyń esh ábestigi joq. Kerisinshe, tazalyq saqtaý – súnnet. Óz jatqan-turǵan jerińdi taza ustaý, erteń as ishetin ydysyńdy búgin jýyp qoıý degen tazalyq. Al tazalyq ımannan emes pe?», - deıdi ánshi beınejazbada.