Halqymyz «Jaqsynyń jaqsylyǵyn aıt nury tasysyn», - dep bekerden-beker aıtpaǵan. Oryndy aıtylǵan jyly sóz adamdy jigerlendiredi, ómirge qushtarlyǵyn arttyrady, jan saraıyn jańǵyrtady. Janyńda júr jaqsy adam demekshi, keıde biz janymyzda júrgen jaqsy adamdardyń iskerlik qasıetin baǵalaı almaı jatamyz. Birimiz onyń jasap jatqan jumysyna ishteı súısinsek, endi birimiz ózimizshe moıyndamaımyz. Áıtse de, bardy bar, joqty joq dep aıtqanǵa ne jetsin ...
Iá, kópten beri janyma jalaý bolǵan osy bir uzyn boıly, aqquba kelgen naǵyz ofıser jaıly jazýdy oılap júr edim. Búgin sonyń sáti túsip, ózgeshe qurmetpen qaraıtyn áriptesim týraly qalam terbep otyrmyn.
Polkovnık Dáýren Qýanyshulynyń esimi Shekara akademıasy, UQO jáne Shekara qyzmetindegi áskerı qyzmetshilerge jaqsy tanys, tulǵalyq qasıet qalyptastyrǵan birtýar azamat. Shekarashy kýrsanttarǵa sanaly tárbıe berýde ónegeli úlgisimen, jańashyldyq jolymen, bastamashyl is-áreketimen abyroıly qyzmet atqaryp júrgen tájirıbeli shekarashynyń tynymsyz eńbegi qandaı qurmetke de laıyqty. Ol ujymda janynyń tazalyǵymen, kóńiliniń adaldyǵymen, qarapaıym minezimen jáne qyzmettegi bilgirligi úshin úlgi tutyp syılaıtyn, árdaıym bilikti maman retinde erekshelenedi.
Biz áńgimelep otyrǵan Dáýren Qýanyshuly Qazaqstan Respýblıkasy Ulttyq qaýipsizdik komıtetiniń Shekara akademıasynda qyzmet etedi. Tárbıelik, áleýmettik-quqyqtyq jáne ıdeologıalyq jumystar basqarmasy bastyǵynyń orynbasary laýazymynda. Tártip pen tárbıe tizginin teń ustaǵan tárbıeshi ofıser. Atalmysh oqý ornynyń 1998 jylǵy túlegi. Óziniń aıtýyna qaraǵanda, kýrsant kezinde oqyǵan 4-oqý dıvızıonynda kýrsanttar kóp bolǵan soń bulardy basqa áriptesteri «Mongoly» dep ataǵan eken.
Ol óz kezeginde talaı ret oqý dıvızıondary arasynda jáne qalaaralyq uıymdastyrylǵan KVN oıyndaryna qatysyp, kópshiliktiń kóńilinen shyǵyp ónerpaz atanǵan. Keıinnen qyzmet atqara júrip, kýrsanttardy osy ónerge baýlyp, birneshe ret júldeli oryndarǵa qol jetkizip, sonaý Reseı Federasıasynyń Sochı qalasyna deıin baryp, kýrsanttardyń ónerin pash etip kelgen.
Alǵashqy «leıtenant» áskerı sheninen «polkovnık» shenine deıin jetken shekarashy kez kelgen iste aldyna qoıǵan maqsatyna jetpeı qoıǵan emes. Bir nárseni oıyna aldy ma, sony aıaǵyna deıin jetkizbeı tynbaıtyn tynymsyz jan. Búginde onyń bastamashyldyǵymen Shekara akademıasynda kóptegen ıgilikti ister júzege asyrylyp keledi.
Atap aıtqanda: Shekara akademıasy emblemasynyń eskızin jáne kádesyı buıymdarynyń dızaınyn jasaýdy jáne bitirýshi túlekterge arnaıy dańqty qolbasshy Baýyrjan Momyshuly týraly jazylǵan Aleksandr Bektiń «Volokolamskoe shose» kitabyn saltanatty túrde tabys etý rásimin dástúrge aınaldyrdy.
Sonymen qatar, shekarashy ofıserdiń kelissózder júrgizýdegi sheberliginiń nátıjesinde arý qalamyz Almatydaǵy Halyq banktyń «FREEDOM LIFE» qyzmetkerlerimen ortaq mámilege kelip, qarjylaı qoldaý kórsetýdi uıymdastyryp, eki birdeı psıhologıalyq túzetý jáne ońaltý zerthanasynyń paıdalanýǵa berilgenin aıta ketkenimiz jón.
«Jas shekarashy» balalar áskerı-patrıottyq klýby men Shekara akademıasynyń Áıelder qaýymdastyǵy uıymynyń júzege asýyna da Dáýren Qýanyshuly tikeleı sebepshi boldy.
Shekara akademıasynyń oń ımıjin qalyptastyrý maqsatynda abyroıyn asqaqtatyp, bedelin bıiktetetin vıdeo rolıkterdi montajdap, áleýmettik jelilerge turaqty túrde jarıalap turýdy ádetke aınaldyrǵan kreatıvti ofıser keıingi jastarǵa jıǵan tájirıbesin úıretýden jalyqqan emes. Ujymda «basqarma ensıklopedıasy» dep jas ofıserler keıipkerimizdiń aqyl-keńesine júginýdi úrdiske aınaldyrǵan. Óz kezeginde olar da kez kelgen ýaqytta jolyǵyp, óz oılaryn ortaǵa salyp, árdaıym kóńilge qonymdy, tolyqqandy keńes alyp turady.
Dáýren Belgojaevtyń boıyndaǵy aıta ketetin taǵy bir ereksheligi - onyń tula boıy tolǵan ıdeıa. Ol óz mamandyǵyn jete meńgergen, jınaǵan tájirıbesi mol tálimger. Ásirese, onyń uıymdastyrýshylyq qabileti erekshe damyǵan. Mysaly, naýryz aıynda Shekara akademıasynyń qabyrǵasynda ótken Halyqaralyq TMD Shekara áskerleri qolbasshylyǵy keńesiniń ókilderine uıymdastyrylǵan konserttik baǵdarlamany TMD Shekara áskerleri keńesiniń tóraǵasy armıa-generaly V.Kýlıshovtyń ózi joǵary baǵalap, marapattaǵan.
Ǵasyrǵa jýyq tarıhy bar Shekara akademıasynyń toqsan jyldyǵyna oraı Akademıanyń tynys-tirshiliginen syr shertetin qundy kitaptyń jaryq kórýine tikeleı at salysqan Dáýren Qýanyshuly, mundaǵy orys tilinde jazylǵan ár materıaldy oqyp, ondaǵy kemshilikterdi, jetispeı turǵan jerlerdi kórsetip, mereıtoılyq kitaptyń sapaly bolyp shyǵýyn myqtap qolǵa aldy. Ol munymen de toqtap qalmady, árqashanda izdeniste júretin bilikti ofıser ujymdaǵy áriptesteri men birigip, akademıa aýmaǵyndaǵy stendter men bannerlerdiń, oqý dıvızıondarynyń mádenı-aǵartý múlikterin jáne «Erlikpen qaza tapqan Shekara akademıasynyń túlekteri» týraly memorıaldyq eskertkish taqtanyń boı kóterýin tolyqtaı qamtamasyz etilýine at salysty.
«Gazet - halyqtyń kózi, qulaǵy hám tili», - dep Ahmet Baıtursynov aıtpaqshy Shekara akademıasynyń ózindik basylymy bolyp tabylatyn «Akademıa: Búgin. Erteń. Keshe.» atty aılyq gazetiniń búginde óz jalǵasyn taýyp jaryq kórýine qoldaý bildirgen tárbıeshi ofıser, jaqynda ǵana UQK baspasóz qyzmetimen kelisip, iske qosylǵan telegram-kanalynyń qurýshysyna aınalyp úlgerdi. Sondaı-aq Akademıa tarıhynan habardar etetin sýretter men kómkerilip, sapaly bezendirilgen toqsan saıyn jaryq kóretin álbomnyń shyǵýyna bastamashy bolǵan D.Belgojaev, kýrsanttyq ánurannyń shyǵýyna sebepker.
Áriptesimizdiń óz isiniń maıtalmany ekenine eshkimniń talasy joq. Onyń ujym aldyndaǵy atqaryp jatqan jumystaryn aıta bersek bir maqalanyń kólemine syıǵyzý múmkin emes. Biz eń mańyzdy degenderine ǵana toqtalyp óttik. Budan basqa da belsendilik tanytyp, atqaryp jatqan isteri jetip artylady.
Al adamgershiligi turǵysynan syr sherte ketsek, búgin taýsylmasy belgili. Qolynan kelse jaqsylyq jasap, kishige aǵa, úlkenge ini bolyp júretin jaqsy qasıetterin únemi kórip júrmiz. Bireýlerge istegen jaqsylyǵyn buldamaıtyn asyl qasıeti taǵy bar.
Olaı bolsa, sózinen de, qolynan da is keletin júıriktiń aldaǵy qyzmetine sáttilik tilep, osy qarqynyńnan taıma degimiz keledi.
Bir sózben aıtqanda Dáýren Qýanyshuly – nar tulǵa, myqty azamat, «naǵyz polkovnık»!