Memleket basshysynyń Italıaǵa resmı sapary Prezıdent Serdjo Mattarellamen kezdesýden bastaldy.
Eki el basshylarynyń kelissózine deıin Kvırınale saraıynda Qazaqstan Prezıdentin saltanatty qarsy alý rásimi ótti. Qasym-Jomart Toqaevtyń qurmetine Qazaqstan týy kóterilip, qos memlekettiń ánurandary shyrqaldy. Qurmet qaraýyly bastyǵynyń raportynan keıin prezıdentter bir-birine resmı delegasıa ókilderin tanystyrdy, dep habarlaıdy almaty-akshamy.kz
Qasym-Jomart Toqaev óz sózinde bul Qazaqstan Prezıdenti retinde Italıaǵa jasaǵan alǵashqy sapary ekenin atap ótip, qonaqjaılyq kórsetkeni úshin Serdjo Mattarellaǵa alǵys aıtty. Memleket basshysy elimizdiń Eýropa Odaǵyndaǵy senimdi seriktesteriniń biri – Italıa Respýblıkasymen qarym-qatynasy uzaq ýaqyttan beri ózara tıimdi sıpatta damyp kele jatqanyn jetkizdi.
– Men búgin ózara múddeni kózdeıtin máselelerdi, atap aıtqanda, ekonomıkalyq baılanystardy damytý jáne eki eldi órkendetýge baǵyttalǵan qatynastardy nyǵaıtý, sondaı-aq halyqaralyq ózekti máselelerdi sheshý joldaryn talqylaǵym keledi, – dedi Prezıdent.
Qasym-Jomart Toqaevtyń aıtýynsha, Italıa Qazaqstannyń Eýropadaǵy negizgi saýda seriktesteriniń biri.
– Ózara saýda-sattyq kólemi 14,5 mıllıard dollardan asty. Taıaý jyldary elderimiz arasyndaǵy taýar aınalymy 20 mıllıard dollarǵa jetedi dep senemiz. Italıa – Qazaqstan ekonomıkasyna qarjy salǵan basty ınvestorlardyń biri. Bizdiń naryqta 300-ge jýyq ıtalıalyq kompanıa jumys isteıdi, sonyń ishinde ENI kásiporny da bar. ENI – kóshbasshy kompanıa. Biz ekijaqty qatynastardaǵy jetistikterdi joǵary baǵalaımyz. Biz olardyń jumys isteýi úshin qolaıly jaǵdaı jasaýdy odan ári jalǵastyra beremiz. Degenmen ekonomıka baǵytyna ǵana emes, mádenıet, týrızm sıaqty basqa da kóptegen saladaǵy yntymaqtastyqty damytýǵa tyń serpin berý qajet. Qazaqstan men Italıa arasyndaǵy yntymaqtastyq óte tabysty bolatynyna senimdimin, – dedi Prezıdent.
Sonymen qatar Qasym-Jomart Toqaev sheteldik ınvestorlar úshin el ekonomıkasynyń anaǵurlym tartymdy jáne perspektıvti salalary, onyń ishinde «jasyl» energetıka týraly egjeı-tegjeıli málimet berdi.
Memleketter basshylary Qazaqstan men Italıanyń álemdik arenadaǵy, onyń ishinde BUU men EQYU aıasyndaǵy ózara is-qımyl máselelerine arnaıy toqtaldy.
Eki el prezıdentteri BUU Jarǵysynyń qaǵıdattaryn qurmetteý negizinde halyqaralyq qatynastar men jahandyq qaýipsizdik júıesin nyǵaıtýdyń mańyzdy ekenin atap ótti.
Sonymen qatar taraptar Qazaqstan men Ortalyq Azıanyń Eýropa Odaǵymen aradaǵy yntymaqtastyǵyn damytý perspektıvalaryn talqylap, kólik jáne logıstıka salasyndaǵy ózara tıimdi yqpaldastyqtyń, atap aıtqanda, Transkaspıı halyqaralyq kólik baǵytyn órkendetýdiń keleshegi zor ekenin erekshe atap ótti.
Memleket basshysy oraıly sátti paıdalana otyryp, Prezıdent Mattarellany Italıanyń «Úlken jetilikke» tóraǵalyq qyzmetine kirisýimen quttyqtap, G7-niń kún tártibin júzege asyrý isinde tabys tiledi.
Óz kezeginde, Serdjo Mattarella Italıa Qazaqstanda júrgizilip jatqan saıası jáne qoǵamdyq reformalarǵa úlken qyzyǵýshylyq tanytyp otyrǵanyn atap ótip, Rımge saparmen kelgeni úshin Qazaqstan Prezıdentine alǵys aıtty. Sondaı-aq búgingi kelissózderdiń nátıjesi ekijaqty ekonomıkalyq, saıası jáne mádenı-gýmanıtarlyq baılanystarǵa tyń serpin beredi dep senim bildirdi.
Dostyq ráýishte ótken kezdesý sońynda Qasym-Jomart Toqaev Serdjo Mattarellany Qazaqstanǵa saparmen kelýge shaqyrdy. Italıa Prezıdenti Memleket basshysynyń shaqyrýyn rızashylyqpen qabyl aldy. Munan soń kelissóz dastarqan basynda jalǵasty.