Prezıdent Áýlıetaýdyń eteginde Memlekettik rámizder alańyn ashýdy tapsyrdy.
Ulytaýda Ulttyq quryltaıtyń alǵashy jıyny ótip jatyr, dep habarlaıdy Almaty-akshamy.kz.
Memleket basshysy Qasym-Jomart Toqaev Ulttyq quryltaıdyń Ulytaýda bastalǵany durys bolǵanyn alǵa tartty. Onyń aıtýynsha kıeli ólke Jańa Qazaqstandy qurý jolynda birliktiń sımvolyna aınaldy. Osy oraıda Prezıdent taǵy bir bastama kóterdi.
"Bul jerde barlyq rýlardyń tańbasy tasqa jazylǵan. Sol arqyly babalarymyz ult birligin kórsetken. Qanysh Sátbaev «Elimizdiń tý tikken jeri – Tańbaly tas» degen. Ókinishke qaraı, qasterli jazýlar keıin ábden búlindi. El azamattary Ulytaýǵa eskertkish qoıyp, tastaǵy tańbalardy jańǵyrtty. Biraq, bul jetkiliksiz dep oılaımyn. Munda qazaqtyń birligin áıgileıtin sáýletti nysan turýy kerek", - dedi Qazaqstan Respýblıkasynyń Prezıdenti Qasym-Jomart Toqaev.
Quryltaı jıyny barysynda Prezıdent kıeli jerde elimizdiń kók baıraǵy jelbirep turýy kerektigin aıtty.
"Men Áýlıetaýdyń eteginde Memlekettik rámizder alańyn ashýdy tapsyramyn. Qasıetti óńirde kók baıraǵymyz asqaqtap turýǵa tıis. Sol arqyly urpaqtar sabaqtastyǵy jalǵasyp jatqanyn kórsetemiz. Tamyry tereń memlekettigimizdiń jańa dáýiri bastalǵanyn bildiremiz", - dedi Memleket basshysy.