Qazaqstan Prezıdenti Polsha Respýblıkasy Senatynyń Marshaly Tomash Grodzkııdi qabyldady
Memleket basshysy Qasym-Jomart Toqaev elimizge resmı saparmen kelgen Polsha Respýblıkasy Senatynyń Marshaly (Spıkeri) Tomash Grodzkıımen kezdesý ótkizdi, dep habarlaıdy Almaty-akshamy.kz
Áńgimelesý barysynda ekijaqty yntymyqtastyqty damytý perspektıvasy talqylandy.
– Parlamenttiń burynǵy spıkeri retinde parlamentaralyq dıplomatıany damytýǵa basa mán beremin. Elderimizdi burynnan beri kele jatqan dostyq jáne kóptegen baǵyttar boıynsha yntymaqtastyq baılanystyratynyn atap ótkim keledi. Polshany Qazaqstannyń Ortalyq Eýropadaǵy mańyzdy ári senimdi seriktesi dep bilemiz. Polshada bolyp jatqan jaǵdaıdy jiti baqylap otyramyz. Sizdiń elińizge jáne halqyńyzǵa zor qurmetpen qaraımyz, – dedi Qasym-Jomart Toqaev.
Qazaqstan Prezıdenti memleket basshylary arasynda senimdi dıalog ornaǵanyn jáne osyndaı qarym-qatynastar eki eldiń zań shyǵarýshy organdary deńgeıinde de jalǵasatynyn atap ótti.
– Yntymaqtastyǵymyzdyń keleshegi zor dep oılaımyn. Sizdiń saparyńyz – osy ózara aýqymdy yqpaldastyqtyń aıqyn dáleli, – dedi Qazaqstan Prezıdenti.
Óz kezeginde Tomash Grodzskıı Qasym-Jomart Toqaevqa qonaqjaılyq kórsetkeni úshin alǵys bildirip, Qazaqstan Parlamenti qos palatasynyń tóraǵalarymen tabysty kezdesýler ótkizgeni týraly aıtty.
– Qazaqstanǵa saparymyz eki el arasyndaǵy ózara baılanysty damytýǵa tyń serpin beredi dep oılaımyn. Táýelsizdiktiń 30 jyly ishinde Sizderdiń elderińizdiń damý qarqyny tańǵaldyrǵanyn shynaıy túrde moıyndaımyz. Bul Qazaqstannyń Tuńǵysh Prezıdentiniń kóregendiliginiń arqasynda júzege asyryldy. Halyqtarymyz ekonomıkalyq daǵdarystyń kúrdeli kezeńinde damı bastady. Qazaqstandy damytý, Nur-Sultan qalasyn órkendetý jáne elińizde demokratıany qalyptastyrý jolyndaǵy jetken jetistikterińiz bizge erekshe áser etti, – dedi Polsha Senatynyń spıkeri.
Kezdesý barysynda eki el arasyndaǵy saýda-ekonomıkalyq, ınvestısıalyq, ınfraqurylymdyq jáne bilim berý salalary boıynsha baılanystardy damytý áleýeti atap ótildi.
Tomash Grodzkıı Aqmola oblysyna saparmen baryp, ondaǵy polák dıasporasy ókilderimen ótkizgen kezdesýine qatysty oı-pikirin ortaǵa saldy. Polsha Parlamenti joǵarǵy palatasynyń basshysy deportasıa jyldarynda qazaq halqynyń dostyq nıeti men qonaqjaılylyǵynyń arqasynda Qazaqstan poláktardyń ekinshi Otanyna aınalǵanyn atap ótti.
