Qazirgi tańda Qazaqstanda kondısıoner ornatýǵa tyıym salatyn zań joq, dep habarlaıdy aqshamnews.kz
Krisha málimetinshe, keıbir dızaın-kodtar ǵımarattardyń aldyńǵy betine kondısıoner qoımaýdy, ortaq dekoratıvti qoraptardy paıdalanýdy, symdar men qubyrlardy kózden tasa jerde júrgizýdi usynady. Biraq bul – mindetti talap emes. Kondısıoner ornatýǵa ruqsat tek tarıhı ǵımarattar úshin qajet jáne bul talap, eń aldymen, jańa úıler men qurylys kompanıalaryna qatysty. Qarapaıym turǵyndarǵa qatysy joq.
Kondısıoner ornatý úshin kórshilerdiń kelisimi talap etilmeıdi, óıtkeni bul qaıta josparlaý bolyp sanalmaıdy jáne ortaq múlikke áser etpeıdi.
Qoǵamda bul máselege qatysty túrli tyıymdar týraly áńgimeler aıtylyp júr. Olar jańa Sáýlet-qurylys kodeksin talqylaýmen baılanysty. Alaıda ol qujatta kondısıonerge naqty tyıym salý týraly bap joq. Árbir páter ıesi eger ózgelerge zıan keltirmese, óz qabyrǵasyna kondısıoner ornatýǵa quqyly.
– Kondısıoner ornatý – bul qaıta josparlaý da, qaıta jańartý da emes. Ol ınjenerlik jelilerge jáne ortaq múlikke áser etpeıdi. Kondısıoner óz qabyrǵańa ornatylady – boldy. Ákimshilik quqyq buzýshylyqtar kodeksinde kondısıonerge qatysty bap joq. Al 505-bap múlde basqa nársege – qoqys, ınfraqurylymdy búldirý, aǵash kesýge arnalǵan. Fasadtar oǵan kirmeıdi, – dep túsindirdi zańger Arkadıı Rýbsov.
Aıta keteıik, buǵan deıin keıbir buqaralyq aqparat quraldary men áleýmettik jelilerde kondısıoner ornatqany úshin qazaqstandyqtarǵa 78 myń teńge aıyppul salynady degen aqparat taraǵan bolatyn. Bul málimet shyndyqqa janaspaıdy.