Qasym-Jomart Toqaev pen Ýhnaagıın Hýrelsýh eki el delegasıa músheleriniń qatysýymen keńeıtilgen quramda kelissóz ótkizdi, dep habarlaıdy aqshamnews.kz.
Qazaqstan Prezıdenti shaǵyn quramdaǵy kezdesýdiń qorytyndysyna joǵary baǵa berip, Mońǵolıamen memleketaralyq qarym-qatynasty odan ári damytýdyń basym baǵyttaryn aıqyndady.
– Qazaq jáne mońǵol halyqtary – Uly dala órkenıetiniń muragerleri. Yntymaqtastyqty jańa strategıalyq deńgeıge kóterý eki eldiń múddesine saı keledi. Biz mońǵol halqyna úlken qurmetpen qaraımyz jáne Mońǵolıanyń jetistigine árdaıym qýanamyz. Qazirgi ýaqytta Sizdiń bastamańyzben aýqymdy saıası-ekonomıkalyq jáne áleýmettik reformalar qolǵa alyndy. «Vision-2050», «Azyq-túlikpen qamtamasyz etý jáne onyń qaýipsizdigi», «Salaýatty mońǵol ulty» sıaqty mańyzdy memlekettik baǵdarlamalar júzege asyrylyp jatyr, – dedi Memleket basshysy.
Qasym-Jomart Toqaev eki eldiń arasynda tyǵyz parlamentaralyq jáne úkimetaralyq baılanystar qalyptasqanyn eske salyp, yntymaqtastyqty nyǵaıtýǵa aıtarlyqtaı múmkindik bar ekenine nazar aýdardy
– Saýda-ekonomıka, aýyl sharýashylyǵy, kólik-logıstıka, taý-ken ındýstrıasy, ónerkásip, ınvestısıa, jańa tehnologıalar, ǵaryshty ıgerý salalarynda yqpaldastyqty jandandyrý qajet. Búgin qol qoıylatyn qujattar saıası jáne ekonomıkalyq alys-beristi damytýǵa tyń serpin beredi dep senemin, – dedi Prezıdent.
Qasym-Jomart Toqaev qol jetkizilgen ýaǵdalastyqtardy eki el úkimetteri ýaqtyly jáne sapaly júzege asyrýy qajet dep sanaıdy.
Ýhnaagıın Hýrelsýh Mońǵolıanyń Qazaqstanmen ekijaqty baılanystardyń barlyq baǵytyn nyǵaıtýǵa beıil ekenin rastady.
Ol búgin qol jetkizilgen ýaǵdalastyqtar eki el arasyndaǵy qarym-qatynastyń jańa paraǵyn ashatynyna senim bildirdi.
Ýhnaagıın Hýrelsýh Qazaqstandy Mońǵolıanyń mańyzdy seriktesi, sondaı-aq Shyǵys pen Batystyń arasyndaǵy altyn kópir ekenin atap ótti. Onyń sózinshe, Ulan-Batyr Qazaqstannyń ekonomıkalyq damý tájirıbesine den qoıyp otyr. Sonymen qatar saýda, kólik-logıstıka, aýyl sharýashylyǵy, ǵaryshty zertteý salalaryndaǵy ekijaqty jobalardy tıimdi júzege asyrýǵa aıryqsha mán beredi. Atap aıtqanda, Ýhnaagıın Hýrelsýh Qasym-Jomart Toqaevtyń eki el arasyndaǵy taýar aınalymyn 500 mıllıon dollarǵa deıin jetkizý týraly usynysyn qoldady.
Buǵan deıin, Qazaqstan men Mońǵolıa prezıdentteri shaǵyn quramda kelissóz júrgizgeni týraly jazǵan bolatynbyz.