Almatyda 18-24 qazan aralyǵynda respýblıkalyq «Taza Qazaqstan» baǵdarlamasy men qalalyq «Jarqyn kúz» naýqany aıasynda plasık ydystardy jınaý boıynsha «Plastic Reboot» aksıasy ótti. Bir apta ishinde qala turǵyndary ekologıalyq jaǵdaıdy jaqsartýǵa degen qyzyǵýshylyqtaryn bildirip, 26 950 dana plasık tapsyrdy. Ásirese, Jetisý jáne Almaly aýdandarynyń turǵyndary belsendilik tanytty.
«Plastic Reboot» aksıasy qaıta óńdeý ıdeıasyn nasıhattaýǵa jáne qoqysty bólek jınaý mádenıetin qalyptastyrýǵa baǵyttalǵan. Naýqan barysynda jınalǵan plasık qaıta óńdeýge jiberilip, tabıǵatqa keri áserin tıgizetin plasık qaldyqtarynyń kólemin azaıtýǵa múmkindik beredi.
Sondaı-aq, qalada plasık bótelkelerdiń qaqpaǵyn jınaý boıynsha «Meıirimdi qaqpaq» aksıasy jalǵasýda, ol qaladaǵy oqý oryndarynda ótýde. Aksıa osy jyldyń jeltoqsanyna deıin jalǵasady, oǵan balabaqsha tárbıelenýshileri, oqýshylar men stýdentter belsendi túrde qatysyp otyr. Uıymdastyrýshylar balalardyń eko-jobada mańyzdy ról atqaratynyn aıtady, sebebi olardyń qatysýy arqyly tabıǵatqa degen oń kózqaras jas kezinen qalyptasady.
Qaqpaqtardy jınaý nátıjesinde qaıta óńdelgen plasıkten jasalǵan erekshe jańajyldyq shyrsha qurý josparlanyp otyr. Bul sımvolıkalyq art-nysan Jańa jyl merekelerinde qala alańdarynyń birine ornatylyp, turǵyndardyń nazaryn qaıta óńdeýdiń jáne ekologıalyq ómir saltynyń mańyzdylyǵyna aýdarýǵa baǵyttalady.