Memleket basshysyna kompanıanyń bıyl birinshi jartyjyldyqta atqarǵan operasıalyq jáne qarjylyq qyzmetiniń nátıjesi týraly esep berildi. Prezıdentke "QazMunaıGaz" kompanıasy byltyrǵy osy kezeńmen salystyrǵanda barlyq negizgi kórsetkish boıynsha ósimge qol jetkizgeni baıandaldy, delingen Aqorda habarlamasynda.
Maǵzum Myrzaǵalıev iri ınvestısıalyq jobalardyń júzege asyrylý barysy, atap aıtqanda, Atyraý oblysynda qýaty jylyna 1 250 myń tonna polıetılen óndiretin zaýyttyń jáne Mańǵystaý oblysynyń Jańaózen qalasynda jańartylatyn energıa kózderin paıdalaný arqyly jumys isteıtin gıbrıdti elektr stansıasynyń qurylysy jóninde aıtty.
Memleket basshysyna munaı óńdeý zaýyttarynyń jumysy, janar-jaǵarmaı materıaldary óndirisiniń qarqyny jáne olardyń qoryn qalyptastyrý týraly málimet berildi. Atap aıtqanda, "QazMunaıGaz" Fransıanyń Air Liquide kompanıasymen birlesip, Pavlodar munaı hımıasy zaýytynda 160 myń tonnaǵa deıin qysqy dızel otynyn óndirýge múmkindik beretin jobany iske asyrýǵa nıetti.
Kezdesý sońynda Qasym-Jomart Toqaev geologıalyq barlaý jumystaryn damytý jáne perspektıvti barlaý ýchaskelerin zertteý úshin iri ınvestorlar tartý jóninde birqatar tapsyrma berdi.