Prezıdentke Ál-Farabı atyndaǵy QazUÝ rektory ýnıversıtettegi maman daıarlaý isiniń, ǵylymı-zertteý jumystarynyń nátıjeleri týraly baıandalyp, kelesi jyly 90 jyldyǵyn atap ótetin joǵary oqý ornynyń strategıalyq damý jospary tanystyryldy, dep habarlaıdy almaty-akshamy.kz.
Janseıit Túımebaev ýnıversıtette jalpy quny 8,1 mıllıard teńge bolatyn 400 ǵylymı joba iske asyrylyp jatqanyna toqtaldy. Sonymen qatar, Prezıdenttiń mamyr aıyndaǵy QHR-ǵa resmı sapary aıasynda QazUÝ-da Qytaıdyń Soltústik-Batys polıtehnıkalyq ýnıversıtetiniń fılıalyn ashý jóninde kelisimge qol qoıylǵan bolatyn. 12 qazanda ýnıversıtet bazasynda atalǵan oqý ornynyń fılıaly ashylǵanyn jetkizdi. 2024-2026 jyldary QazUÝ qalashyǵy qurylysynyń ekinshi kezeńi júzege asyrylatyny jóninde málimet berdi. Jańa qalashyqta 8 oqý korpýsy, tehnopark jáne 12 jataqhana boı kóterse, jýyq arada 3180 oryndyq 3 jataqhananyń qurylysy bastalatyny jaıynda Prezıdentke baıandady.
Kezdesý sońynda Qasym-Jomart Toqaev bilim sapasyn jaqsartý, elimizdiń damýyna ǵylymnyń qosatyn úlesin arttyrý jáne ýnıversıtet qalashyǵyn jańǵyrtý jóninde naqty tapsyrmalar berdi.