Memleket basshysy Qasym-Jomart Toqaev qańtar oqıǵasy kezinde qaıtys bolǵan azamattardyń rýhyna meshitte quran baǵyshtaǵannan keıin halyqqa úndeý jasady, dep habarlaıdy Aqorda.
Ardaqty aǵaıyn!
Bıylǵy jyl elimiz úshin qaıǵyly oqıǵadan bastaldy. Halqymyz óte qıyn synaqty bastan ótkerdi. Memleketimizdiń tutastyǵyna, azamattarymyzdyń qaýipsizdigine, elimizdiń bolashaǵyna qaýip tóndi. Biz lańkesterge der kezinde toıtarys berip, betin qaıtardyq. Ókinishke qaraı, dúrbeleńde kóptegen azamatymyz qaza tapty. Bul – naǵyz qasiret.
Qazirgi tańda tıisti mekemeler azamattardyń árbir isi boıynsha tergeý jumystaryn júrgizip jatyr. Adam quqyǵyn qorǵaý máselesi men úshin asa mańyzdy. Qaıǵyly jaǵdaı búkil eldiń qabyrǵasyn qaıystyrdy. Osyǵan baılanysty Jalpyulttyq aza tutý kúnin jarıaladyq.
Sol qasiretti oqıǵadan beri 40 kún ótti. Búgin marqumdardyń rýhyna quran baǵyshtaý úshin meshitke arnaıy keldim. Qaza bolǵan adamdardyń jaqyndaryna taǵy da kóńil aıtamyn.
Memleket qaraly shańyraqtardy qaraýsyz qaldyrmaıdy. Men qaıtys bolǵan azamattardyń otbasylaryna qarjylaı kómek kórsetýdi tapsyrdym. «Qazaqstan halqyna» qory da osy qaıyrymdylyq jumysqa atsalysady dep oılaımyn.
Endi halqymyzdyń bereke-birligi men tynyshtyǵyn buzýǵa jol bermeımiz. Bul – bıliktiń ǵana emes, barsha azamattarymyzdyń ortaq boryshy. Mundaı qasiret eshqashan bolmasyn! Qazaqstan halqyna sabyr tileımin!
Bárimiz tutas el bolyp, Jańa Qazaqstandy quraıyq! Jańa Qazaqstan – barshamyzdyń ortaq úıimiz, onyń irgesin birge qalaıyq! Bul óskeleń urpaq úshin kerek.
Elimiz aman, jurtymyz tynysh bolsyn!