Elimiz ınvestısıalyq ahýaldy jaqsartýǵa erekshe kóńil bóledi
Qazaqstan Prezıdenti Qasym-Jomart Toqaev Aqorda rezıdensıasynda shet memleketterdiń iri ınvestısıalyq kompanıalary ókilderimen kezdesti, dep habarlaıdy Almaty-akshamy.kz Aqordanyń resmı saıtyna silteme jasap.
Jıynda Memleket basshysy sheteldik ınvestısıalar Qazaqstan damýynyń negizgi faktorlarynyń birine aınalǵanyn, sondyqtan elimiz ınvestısıalyq ahýaldy jaqsartýǵa erekshe kóńil bóletinin atap ótti.
«Bul saladaǵy júıeli ári jan-jaqty jumystar bizdi Ortalyq Azıadaǵy eń iri, postkeńestik keńistikte jyldam damyp kele jatqan ekonomıkalardyń birine aınaldyrdy. Táýelsizdik jyldary shetelden 370 mıllıard dollardan astam tikeleı ınvestısıa tarttyq. Memleket ınvestorlardy barlyq jaǵynan qoldaýǵa basymdyq beredi. Biz árbir ınvestordy jeke ári keshendi qoldaý qaǵıdatyn engizdik», – dedi Qasym-Jomart Toqaev.
Prezıdent tikeleı ózi tóraǵalyq etetin Sheteldik ınvestorlar keńesiniń ınvestorlarmen ózara yqpaldasý úshin negizgi alań ekenin atap ótti. Naqty sektorǵa tikeleı ınvestısıa tartýdan bólek qundy qaǵazdar naryǵyn damytý men sheteldik portfeldi ınvestorlardy elge ákelýge erekshe kóńil bólinip keledi. Memleket basshysy Qazaqstannyń aımaqtaǵy iri kapıtal naryǵyn qurap otyrǵanyn jetkizdi.
«Ulttyq bank negizgi qarjylyq retteýshi retinde qor naryqtaryn odan ári damytý jolynda belsendi jumys istep jatyr. Qazaqstanda bul salanyń quqyqtyq jáne ınfraqurylymdyq baǵyty jetildirilgen. Elimizde eki qor bırjasy – Almatydaǵy KASE jáne Astana halyqaralyq qarjy ortalyǵy tabysty qyzmet atqaryp keledi», – dedi Memleket basshysy.
Prezıdenttiń aıtýynsha, álemdegi jetekshi ýran óndirýshi «Qazatomónerkásip» kásiporyny men qarjy tehnologıasy boıynsha aımaqtaǵy kóshbasshy Kaspi.kz IPO-lary kapıtal naryǵynyń dınamıkasyn arttyryp, ilgerileýine úles qosty.
Qasym-Jomart Toqaev qazir elimizde jekeshelendirý boıynsha aýqymdy jumystar atqarylyp jatqanyn aıtty.
«Qazirgi ýaqytta Qazaqstan ekonomıkasynyń munaı-gaz, energetıka, ınfraqurylym jáne basqa da salalarynda 700-den astam memlekettik kásiporyndy jekeshelendirý boıynsha aýqymdy jumystar júrgizilýde. Biz iri kompanıalardyń aksıalarynyń ulttyq qor bırjalarynda tirkelgenin qup kóremiz», – dedi Memleket basshysy.
Prezıdent búgingi kezdesý qazaqstandyq kapıtal naryqtaryna sheteldik ınvestısıalardy kóptep tartý týraly pikir almasýǵa tamasha múmkindik beretinin aıtty. Sonymen qatar Qasym-Jomart Toqaev osyndaı keleli jıyndy turaqty túrde ótkizýdiń mańyzdy ekenin atap ótti.
Jıynda «Blackrock», «Luxor Capital», «Lugard Road Capital», «Aberdeen Asset Management», «Capital Group», «Sands Capital», «Alameda Research & FTX», «Kingsway Capital» kompanıalarynyń jetekshileri sóz sóıledi.