Kezdesý barysynda Prezıdent Qasym-Jomart Toqaev pen Germanıa ekonomıkasy Shyǵys komıtetiniń basqarma tóraǵasy jáne CLAAS Group kompanıasy baıqaýshylar keńesiniń tóraǵasy Katrına Klaas-Múlhoızer ekijaqty ekonomıkalyq yntymaqtastyqty odan ári nyǵaıtý perspektıvasyn talqylady, dep habarlaıdy Almaty-akshamy.kz Aqordanyń resmı saıtyna silteme jasap.
Memleket basshysynyń aıtýynsha, Germanıa Qazaqstannyń Eýropa Odaǵyndaǵy strategıalyq seriktesi sanalady. Saýda-ekonomıkalyq qatynastar qarqyndy damyp keledi. Sondaı-aq nemis bıznesi Qazaqstandaǵy úlesin keńeıtýge qyzyǵýshylyq tanytyp otyr.
Prezıdent byltyr Qazaqstanǵa Germanıadan tartylǵan tikeleı ınvestısıa kólemi 64 paıyzǵa ósip, 770 mıllıon dollarǵa jetkenin atap ótti. Bul – rekordtyq kórsetkish.
Kezdesýde aýyl sharýashylyǵy salasyndaǵy yntymaqtastyq máselesine de erekshe nazar aýdaryldy. Osy oraıda Qasym-Jomart Toqaev buǵan deıin Ornyqty eginshiliktiń aımaqtyq ortalyǵyn qurý jóninde usynys aıtqanyn eske saldy. Prezıdenttiń pikirinshe, bul ortalyq elimizdiń aýyl sharýashylyǵy áleýetin barynsha tolyq paıdalanýǵa, ınovasıalyq tehnologıalardy engizýge jáne olardy komersıalandyrýǵa yqpal etedi.
Budan bólek, Memleket basshysy Qazaqstannyń agrarlyq áleýetin damytýǵa CLAAS zaýytynyń qosqan úlesin joǵary baǵalady.