Taıaýda jaryq kórgen «Joshy han» tarıhı romany Almatydaǵy oqyrmandarymen qaýyshty dep habarlaıdy Almaty-aqshamy.kz. Búgin Almatyda bastalǵan Qazaq Book Fair kitap kórme-jármeńkesinde atalǵan kitaptyń tanystyrylymy ótti.
Aqyn ári jazýshy Ularbek Dáleıdiń Joshy hanǵa qatysty kólemdi ádebı shyǵarmasy jaryq kórgeli beri oqyrmandardyń qyzýshylyǵyn oıatqany málim. Búgin QR Ulttyq kitaphanasynda ótken sharaǵa alys-jýyqtan kelgen oqyrman zaldy lyq toltyrdy.
Sharaǵa Almatydaǵy jáne ár óńirden kelgen qalamgerler, zıaly qaýym ókilderi men BAQ ókilderi, kópshilik oqyrman qatysty. Olar shyǵarmanyń kótergen aýqymdy tarıhı taqyryby, kórkemdik ereksheligi men til qoldanysy týrasynda pikirlerin ortaǵa saldy. Ári ádebıetimizdegi kópten beri aqsap kele jatqan keń taqyrypqa qalam terbegen avtorǵa alǵystaryn bildirdi.
«Joshy han» tarıhı romanyn Qazaq ádebıetindegi tyń taqyryp retinde ataýǵa bolady. Atalǵan aıbyndy tarıhı tulǵaǵa qatysty buǵan deıin Zardyhan Qınaıatuly syndy ǵalymdardy ǵylymı-zertteý eńbekteri bolmasa, kólemdi ádebı eńbek jazylǵan emes. Kóptegen oqyrmandar úshin de jańa týyndy osy qyrynan qyzyqtyrady.
Kitaptyń tanystyrylymynan keıin avtormen tildesýge mursat aldyq. «Joshy han» shyǵarmasynyń jazylýyndaǵy maqsaty men nátıjesi týraly U.Dáleıuly mynadaı pikirin bólisti:
«Joshy ulysyna deıin de osy dala bizdiń babalardyń mekeni bolǵany daýsyz. Biraq, bizdiń qazirgi terıtorıamyzdyń bir memlekettiń negizine birigýinde irge tasyn qalaǵan Joshy han. Bul turǵy da onyń tarıhı eńbegi óte zor. Oǵan qosa Joshy han týraly buǵan deıin burmalanǵan derekter, alyp-qashpa pikirler de kóp. Biraq soǵan qarsy júıeli ǵylymı eńbekter az, al ádebı shyǵarmalar múlde joq boldy. Mine osydan óz memlekettiligimizdiń o basyndaǵy tulǵa ózimiz úshin «jumbaq tulǵaǵa» aınaldy. Mine osy bir bostyqty toltyraıyq degen maqsatta osy eńbekti jazyp shyqtyq», – deıdi avtor.
«Joshy han» tarıhı romany men kitaptyń tanystyrylymy jaıynda tolyǵyraq «Almaty Aqshamy» gazetiniń aldaǵy sanynan oqı alasyzdar.
Búgingi tanystyrylymǵa qatysa almaǵan oqyrmandar bolsa, aıta ketelik, Qazaq Book Fair kitap kórme-jármeńkesi Ulttyq kitaphanada 3 kún boıy jalǵasady. Jármeńke aıasynda ózge de avtorlardyń eńbekteri jurtqa tanystyrylatyn bolady.