«Ortalyq Azıa – Eýropa Odaǵy» samıti aıasynda Qasym-Jomart Toqaev pen Eýropalyq komısıa Prezıdenti Ýrsýla fon der Láıen kezdesý ótkizdi, dep habarlaıdy aqshamnews.kz
Áńgimelesý barysynda Qazaqstan men Eýropa Odaǵynyń ekonomıkanyń túrli sektoryndaǵy, sıfrlandyrý jáne ınovasıa salalaryndaǵy yntymaqtastyǵyn damytý perspektıvasy talqylandy. Taraptar Qazaqstan men Eýropalyq komısıa arasynda vıza berý tártibin jeńildetý jónindegi kelisimge kelý úderisi bastalǵanyn oń baǵalady.
Qasym-Jomart Toqaev Keńeıtilgen seriktestik jáne yntymaqtastyq jónindegi kelisim Qazaqstan men Eýropa Odaǵynyń san qyrly yqpaldastyǵyna negiz bolyp otyrǵanyn jetkizdi.
Memleket basshysy Qazaqstannyń Eýropamen yntymaqtastyǵyn odan ári tereńdetetin tórt basym baǵytty atady. Bul – energetıka, iri ınfraqurylym jáne ónerkásip jobalaryn júzege asyrý, kólik-logıstıka jelilerin keńeıtý, sondaı-aq sıfrlyq ınovasıa, ozyq tehnologıalar men jasandy ıntellekt baǵytyndaǵy seriktestik.
Ýrsýla fon der Láıen kólik-logıstıka salasyndaǵy, sonyń ishinde Transkaspıı halyqaralyq kólik dálizi sekildi jobalardy iske asyrýdyń mańyzyna toqtaldy. Ol Qasym-Jomart Toqaevty Qazaqstanda sırek kezdesetin metaldardyń iri ken ornynyń tabylýymen quttyqtady.
Taraptar S5+EO aıasyndaǵy jumysty jalǵastyrýǵa ýaǵdalasty. Sonymen qatar óńirlik jáne halyqaralyq kún tártibindegi ózekti máseleler jóninde pikir almasty.