Prezıdent Qazaqstan Eýropadaǵy qaýipsizdik jáne yntymaqtastyq uıymynyń mańyzdy seriktesi ekenin atap ótti.
Qasym-Jomart Toqaev EQYU Demokratıalyq ınstıtýttar jáne adam quqyqtary jónindegi búro dırektory Mateo Mekachchıdi qabyldady, dep habarlaıdyAlmaty-akshamy.kz Aqordaǵa silteme jasap.
Qasym-Jomart Toqaev Mateo Mekachchıge iltıpat bildire otyryp, onyń bul sapary Eýropadaǵy qaýipsizdik jáne yntymaqtastyq uıymymen aradaǵy qarym-qatynasty nyǵaıtý turǵysynan mańyzdy ekenin atap ótti.
Kezdesýde Qazaqstan men EQYU Demokratıalyq ınstıtýttar jáne adam quqyqtary jónindegi búro arasyndaǵy demokratıany damytý, adam quqyqtary men zań ústemdigin qamtamasyz etý salasyndaǵy yntymaqtastyqtyń jaǵdaıy men ony damytý perspektıvalary talqylandy.
Prezıdent Qazaqstan Respýblıkasyndaǵy adam quqyqtary jónindegi ýákil men Búro arasynda qol qoıylǵan ózara túsinistik jónindegi Memorandýmdy qoldady. Onyń aıtýynsha, bul qujat elimizdiń Búromen tyǵyz seriktestikti damytýǵa daıyn ekenin jáne EQYU qundylyqtaryna beıildiligin rastaıdy.
Qasym-Jomart Toqaev Búro dırektoryna Jańa Qazaqstandy qurýǵa baǵyttalǵan aýqymdy reformalardyń negizgi maqsattary men mindetteri jóninde aıtty.
Mateo Mekachchı EQYU Parlamenttik Assambleıasy aıasynda Qasym-Jomart Toqaevpen qyzmettes bolǵan kezeńdi jáne budan buryn Qazaqstanǵa kelgen saparlaryn yqylaspen eske aldy.
Búro dırektory Qazaqstanmen aradaǵy yntymaqtastyqty odan ári nyǵaıtýǵa ázir ekenin atap ótip, elimizben ózara belsendi is-qımyldyń damý barysyna kóńili tolatynyn aıtty.
Sondaı-aq ol Qasym-Jomart Toqaevtyń basshylyǵymen júzege asyrylyp jatqan aýqymdy reformalardy qoldaıtynyn jáne Qazaqstan Eýropadaǵy qaýipsizdik jáne yntymaqtastyq uıymynyń mańyzdy seriktesi ekenin atap ótti.