Bul týraly «Ulttyq aqparattyq tehnologıalar» AQ qoǵammen baılanys bólimi málimdedi.
Habarlama eGov mobıldi qosymshasyndaǵy paıdalanýshynyń jeke kabınetine jiberiledi, dep habarlaıdy Almaty-akshamy.kz
«Jyl saıyn Qazaqstanda myńnan astam aqparattyq júıe hakerlerdiń shabýylyna ushyraıdy, onyń ishinde memlekettik organdar da bar. Endi eGov mobıldi qosymshasy arqyly hakerler men alaıaqtardyń qolynda qandaı derekter bar ekenin baqylaýǵa bolady», - dep habarlady «Ulttyq aqparattyq tehnologıalar» AQ.
Bul bastamany qazir Sıfrlyq damý, ınovasıalar jáne aeroǵarysh ónerkásibi mınıstrliginiń Aqparattyq qaýipsizdik komıteti, Kıbershabýyldardy taldaý jáne tergeý ortalyǵy «Zerde» holdıńimen birlesip ázirleýde.
AQ málimetinshe, saıttarda jeke derekterdi zańsyz jınaý jáne syrtqa shyǵarý faktileri anyqtalǵan jaǵdaıda eGov mobıldi qosymshasyndaǵy paıdalanýshynyń jeke kabınetine habarlama jiberiledi.
Joba 2022 jyldyń sońynda iske qosylady dep kútilýde.
«Qazaqstandyqtar hakerlerlik toptar, alaıaqtar nemese olardyń básekelesteri jeke derekterdi qanshalyqty aram pıǵylmen paıdalana alatynyn túsinbeıdi. Bizdiń maqsatymyz - paıdalanýshylardy múmkindiginshe qorǵaý úshin eGov mobıldi qosymshasy arqyly olardyń qupıa sózderi men derekteriniń taralyp ketkeni týraly habardar etý jáne eskertý, alǵa qoıylǵan mindetti birlesip sheshý kerek», - dedi UAT AQ basqarma tóraǵasy Rostıslav Konáshkın.
«Ulttyq aqparattyq tehnologıalar» AQ «elektrondyq úkimettiń» ınfokommýnıkasıalyq ınfraqurylymynyń jáne memlekettik organdardyń biryńǵaı kólik júıesi operatory bolyp tabylady, sondaı-aq ortalyq jáne óńirlik memlekettik organdardyń aqparattyq júıelerine tehnıkalyq qyzmet kórsetýdi qamtamasyz etedi.