Prezıdent mınıstrdiń esebin tyńdady.
Qasym-Jomart Toqaevqa Joldaýda berilgen tapsyrmalarynyń oryndalý barysy, mınıstrliktiń bilim jáne ǵylym júıesin jaqsartýǵa baǵyttalǵan bastamalary jóninde baıandaldy, dep habarlaıdy Almaty-akshamy.kz Aqordaǵa silteme jasap.
Prezıdentke balalar quqyqtarynyń buzylý faktilerin azaıtý úshin jekemenshik balabaqshalardyń jaýapkershiligin arttyrýǵa jáne mektep baǵdarlamalary men oqýlyqtardy ázirleýdiń jańa tásilderine qatysty usynystar berildi.
Asqat Aımaǵambetovtiń aıtýynsha, Memleket basshysynyń Joldaýda bergen tapsyrmalary aıasynda «Ǵylym týraly» zańǵa ózgertýler engizilgen. Endi tarıh, qazaq tili, fılosofıa, arheologıa, matematıka, shyǵystaný jáne basqa da salalar boıynsha ǵylymı zertteý jumystarymen aınalysyp júrgen 4 myńnan astam ǵalym turaqty eńbekaqy alady. Ǵylymı jobalardy qarjylandyrý merzimi burynǵy 3 jyldan 5 jylǵa deıin sozyldy. Jas ǵalymdardy qoldaý úshin postdoktorantýraǵa myń grant bólindi. Arnaıy konkýrstar bastaldy. Sonyń aıasynda 2 myńnan astam jas ǵalym 17 mıllıard teńgeniń grantyn aldy. Qasym-Jomart Toqaevtyń tapsyrmasy boıynsha ǵalymdardyń áleýetin arttyrý sharalary qabyldandy. Jyl saıyn 500 otandyq maman respýblıkalyq búdjet esebinen álemniń jetekshi ǵylymı ortalyqtarynda taǵylymdamadan ótedi.
Mınıstrdiń esebin tyńdaǵan Prezıdent mekteptegi bilim berý sapasy men muǵalimderdiń mártebesin arttyrý jónindegi maqsatty jumystardy kúsheıtýdi tapsyrdy. Sonymen qatar Memleket basshysy joǵary oqý oryndaryna lısenzıa berý tártibin jetildirý jáne irgeli zertteý jumystaryn júrgizetin ınstıtýttardy qoldaý qajet dep sanaıdy.