Kásiporynǵa 120 adam jumysqa ornalastyrylady.
Taldyqorǵanda mamandar stasıonarlyq akýmýlátor batareıalaryn shyǵaratyn zaýyt salýǵa nıettenip otyr. Oǵan 3,2 mlrd teńge ınvestısıa tartylyp, kásiporynǵa 120 adam jumysqa ornalastyrylady, dep habarlaıdy Almaty-akshamy.kz.
«Almaty oblysynyń ákimi Qanat Bozymbaev osy jobaǵa qatysty kompanıa ókilderimen kezdesip, memorandýmǵa qol qoıdy», - delingen Almaty oblysy ákiminiń baspasóz qyzmetiniń habarlamasynda.
Oblys ákiminiń sózine júginsek, Taldyqorǵan mashına jasaýdyń eksportqa baǵyttalǵan ónimderin shyǵarýdyń ortalyǵyna aınaldy.
«Bul jobany júzege asyrý úshin biz qajetti barlyq ınfraqurylymmen qamtamasyz etetin bolamyz. Investorlar óz tarapynan óndiristik qorǵasyndy-qyshqyldy batareıalar shyǵarýdaǵy tehnologıa transfertterin iske asyryp, jergilikti turǵyndarǵa jumys beredi. Sonymen birge qazaqstandyq taýarlardy, jumystar men qyzmetterdi barynsha mol paıdalanatyn bolady. Usynystaryńyz bolsa, sizderdi tyńdaýǵa ázirmin», - dedi Qanat Bozymbaev.
Óz kezeginde «Asma Industrial» JSHS basshysy Serik Ajmaǵambetov jobanyń ereksheligine toqtalyp, aldaǵy josparlary týraly qysqasha aıtyp berdi.
«Bizdiń batareıalar telekomýnıkasıada, energetıkada, temir jolda, jańartylǵan energıa kózderin paıdalanýǵa qoldanylady. Ónimdi ótkizý naryǵy qazirden anyqtaldy. Postkeńestik elder, Azıa memleketteri, Eýropanyń birqatar elderi ónimderimizdi alýǵa daıyn. Shyǵys ónerkásip aımaǵynan zaýyt salýǵa qajetti jer satyp aldyq. Zaýytqa ornatatyn qural-jabdyqtarymyz túgel, «Qaınar AKB» bazasynda daıyndalǵan mamandarymyz bar. Materıaldyq-kadrlyq múmkindikterimiz jetkilikti bolǵandyqtan, jańa kásiporyndy tabysty júrgizemiz dep senemin, - dedi Serik Ajmaǵambetov.
Kezdesý barysynda aıtylǵandaı, jobany iske asyrý úshin qajetti qosalqy elektr stansasynyń, káriz júıesiniń, zaýyt shekarasyna deıin gaz qubyryn tartý sıaqty ınfraqurylymdyq máselelerdi sheshýge oblys ákimdigi tolyqtaı qoldaý kórsetedi.
«Almaty oblysynyń sý, jel, kún energıasyn óndirýge tabıǵı múmkindigi mol. Al jańa zaýyt shyǵarǵaly otyrǵan batareıalar sol jańarǵan energıa kózderin boıyna jınaqtap, elektr qýatynyń aýa raıyna táýeldiligin azaıtýǵa múmkindik beredi. Sondyqtan bul jobanyń bolashaǵy zor. Bul salany damytý el ekonomıkasyna jańa serpin beredi», - dep atap ótti Qanat Bozymbaev.