Qasym-Jomart Toqaev Portýgalıa Prezıdenti Marselý Rebelý de Soýzamen kelissóz júrgizdi.
Memleketter basshylary eki eldi dostyq qatynastar men ózara tıimdi yntymaqtastyq baılanystyratynyn atap ótti, dep habarlaıdy Almaty-akshamy.kz.
Taraptar ınvestısıa, sý resýrstaryn basqarý, týrızm jáne basqa da salalardaǵy jan-jaqty qatynastardy odan ári arttyrý úshin zor áleýet bar ekenin aıtty. Sıfrlandyrý salasyndaǵy ózara is-qımyldy nyǵaıtý máselelerine erekshe nazar aýdaryldy.
– Sizdiń eldiń IT salasyndaǵy tájirıbesi mol. Osy baǵyttyń bolashaǵy zor ekenin eskere otyryp, men Lıssabonǵa birlesken jobalardy iske asyrý múmkindigin zerdeleý úshin arnaıy delegasıa jiberemin. Qazaqstan portýgalıalyq seriktestermen tyǵyz baılanys ornatýǵa múddeli, – dedi Qazaqstan Prezıdenti.
Sonymen qatar taraptar halyqaralyq kún tártibindegi ózekti máselelerdi talqylady.
Jahandyq uıymdar aıasynda, eń aldymen, BUU sheńberinde ózara is-qımyldy jalǵastyrý týraly ýaǵdalastyqqa qol jetkizildi.
Munan keıin, Memleket basshysy Mońǵolıa Prezıdenti Ýhnaagıın Hýrelsýhpen kelissóz júrgizdi. Qasym-Jomart Toqaev Qazaqstan men Mońǵolıa arasyndaǵy tyǵyz ári dástúrli dostyq qarym-qatynasty atap ótti.
Prezıdent ekijaqty baılanystardy strategıalyq seriktestik deńgeıine deıin keńeıtý múmkindigine nazar aýdardy.
Memleket basshysy saýda-ekonomıkalyq yqpaldastyqqa tyń serpin berý úshin Úkimetaralyq komısıanyń jumysyn jandandyryp, Qazaqstan men Mońǵolıanyń İskerlik keńesin qurý qajet ekenin aıtty. Kezdesý sońynda prezıdentter jaqyn arada bir-biriniń eline saparmen barý múmkindigin talqylady.
Al Kenıa Respýblıkasynyń Prezıdenti Ýılám Rýtomen kezdesýi barysynda Kenıamen saýda-ekonomıkalyq qatynastardy keńeıtý máseleleri talqylandy. Prezıdent Kenıany Afrıka qurlyǵyndaǵy qarqyndy damyp kele jatqan elderdiń biri retinde atap ótip, ózara yntymaqtastyqty damytýǵa erekshe qyzyǵýshylyq týǵyzatyn memleket ekenin jetkizdi.
– Men Kenıanyń damý barysyn, ekonomıkalyq jáne syrtqy saıasatyn qadaǵalap otyramyn. Sondaı-aq Qazaqstan men Kenıa arasyndaǵy yntymaqtastyqty jańa deńgeıge kóterý úshin birlese áreket etýge daıynmyn, – dedi Qasym-Jomart Toqaev.
Óz kezeginde Ýılám Rýto qazaqstandyq kompanıalardy Kenıa ekonomıkasyna belsendi túrde ınvestısıa quıýǵa, sonyń ishinde astyq termınalyn salý arqyly Mombasa portyn keńeıtý múmkindigin qarastyrýǵa shaqyrdy. Memleket basshysy ózara yntymaqtastyqty nyǵaıtýdyń múmkindikterin zertteý úshin Kenıaǵa saýda mısıasyn jiberýge nıetti ekenin aıtty. Prezıdent Afrıka memleketterimen ekijaqty deńgeıde jáne kópjaqty birlestikter aıasynda, eń aldymen BUU sheńberinde ózara baılanysty damytýdyń mańyzdylyǵyn atap ótti. Memleket basshysy Ýılám Rýtony kelesi jyly Qazaqstanǵa saparmen kelýge jáne Astana halyqaralyq forýmyna qatysýǵa shaqyrdy.
Qazaq-koreı strategıalyq seriktestigin odan ári damytý perspektıvalary Koreıa Respýblıkasynyń Prezıdenti Iýn Sok Ólmen kezdesýi barysynda talqylady. Qasym-Jomart Toqaev Qazaqstan men Ońtústik Koreıa arasynda dostyq qarym-qatynastar ornaǵanyn jáne qarqyndy damyp kele jatqan ekonomıkalyq baılanystardyń mańyzy zor ekenin atap ótti. Qazaqstan Prezıdenti ekijaqty taýar aınalymy byltyr 6 mıllıard dollardan asyp, turaqty ósim baıqalyp otyrǵanyn aıtty. Sonymen qatar koreı kompanıalarynyń Qazaqstan ekonomıkasyna salǵan ınvestısıalarynyń jalpy kólemi 8 mıllıard dollardan asyp, elimizdegi eń iri 10 ınvestordyń qatarynda nyq turǵanyn jetkizdi.
Memleket basshysynyń aıtýynsha, búginde Qazaqstanda 700-den astam koreıalyq kompanıa men birlesken kásiporyn jumys isteıdi. Mysaly, elimizdiń naryǵynda KIA, Hyundai, Samsung, LG jáne basqa da kompanıalar belsendi qyzmet etip jatqanyn aıtýǵa bolady. Kezdesý barysynda Qasym-Jomart Toqaev sırek metaldar óndirisin, atom energetıkasyn damytý salalaryndaǵy ekonomıkalyq yntymaqtastyqtyń perspektıvti baǵyttaryna toqtaldy.
Koreıa Prezıdenti Iýn Sok Ól Qazaqstanmen ózara tıimdi yntymaqtastyqty odan ári tereńdetýge múddeli ekenin jetkizdi. Onyń aıtýynsha, koreıalyq kompanıalar mashına jasaý, taý-ken ónerkásibi, atom energetıkasy salalary boıynsha júzege asyrylyp jatqan jobalardy keńeıtýge jáne jańa jobalardy qolǵa alýǵa erekshe qyzyǵýshylyq tanytady.
