Almaty qala kúnine qalaı bezendirildi
Ótken demalys kúnderi Almatyda qala kúnin toılandy. Qyrkúıek aıynda qalada túrli konsertter, festıváldar men sporttyq is-sharalar uıymdastyryldy.
Konserttik is-sharalardan basqa, qalamyzdyń týǵan kúnine qalaı ózgergenin baıqaýǵa bolady. Almatylyq sýretshiler men dızaınerlerdiń shyǵarmashylyǵynyń arqasynda Almaty týǵan kúninde erekshe merekelik keıipke enip, jarqyraı tústi.
Respýblıka saraıynyń aldyndaǵy alańdy erekshe ataýǵa bolady, onda árbir turǵyn men qonaq ótken zamanǵa baryp, burynǵy Almatynyń atmosferasyn sezine alady. Munda siz Gınnestiń rekordtar kitabyna engen álemdegi eń úlken Rýbık teksheleriniń mozaıkasyn, qyzyl ala sút bıdonyn jáne ótken zamannyń kóptegen basqa zatyn kóre alasyz.
Panfılov kóshesiniń jaıaý júrginshiler aımaǵy da dızaın boıynsha erekshelendi. Munda «Qyzǵaldaq qushaǵy» ınstallásıa ornatylǵan. Mundaı bezendirýdiń avtory - sýretshi Dará Moroz.
«Bastapqyda bul jaı ǵana sýret boldy, biraq men ony jandandyryp, ınstallásıaǵa aınaldyrǵym keldi. Ádettegideı bárin óte qysqa merzimde jasadyq, sátti shyqty, soǵan qýanyshtymyz. Almatyǵa erekshe bir nárse jasaǵym keldi, al «Qyzǵaldaq qushaǵy» ınstallásıasy elgezektik, dostyq, tabıǵat pen megapolıstiń ózara baılanysy syndy qalamyzdyń atmosferasyn kórsetedi. Qyzǵaldaq – tabıǵattyń sımvoly, al jartylaı sheńber – bul árdaıym jylýlyqpen jáne jaılylyqpen, úı oshaǵymen baılanysty kıiz úı», - deıdi avtor.
Panfılov kóshesinde Almatynyń peızajdary bar úlken almalardy baıqaýǵa bolady, al keıbir ınstallásıalar ózindik ereksheligimen tań qaldyrdy. Solardyń biri úlken qyzǵylt qorapta Bıbigúl esimdi «Barbı» ınstallásıa. Týyndynyń avtoryna muny oqyrmany aıtqan. Avtory sýretshi-ıllústrator Mımı Ilnıskaıa. Installásıany Panfılov kóshesinen qyrkúıek aıynyń sońyna deıin kórýge bolady.
«Bul qýyrshaq Qazaqstanda shyǵarylsa, qandaı bolatynyn qıaldaǵym keldi. Men kóshpeli qýyrshaq oılap taýyp, sýretimdi áleýmettik jelilerde jarıaladym. Bul ıdeıa adamdarǵa óte unap, jappaı jaza bastady. Men qazaqstandyq Barbı óte erekshe bolýy múmkin ekenin kórsetý úshin basqa sýretterdi sala bastadym. Sonyń nátıjesinde qala kúnine deıin maǵan mádenıet basqarmasynyń ókilderi kelip, týyndymdy ınstallásıaǵa aınaldyrýdy usyndy», - dedi avtor.
Mımıdiń aıtýynsha, jańa qýyrshaqtar turǵyndardy qýantyp, ınstallásıaǵa aınalýy úshin qazaqtyń Barbıin shyǵarý jalǵasady.
Artbatfest kóshe óneri festıvali aıasynda áıgili sýretshi Sáýle Súleımenova ınstallásıany selofan keskindemesi túrinde usyndy. Avtordyń on eki metrlik músinin Abaı dańǵyly men Báıseıitova kóshesiniń qıylysynan kórýge bolady. Sáýle atap ótkendeı, ol poezıany plasık paketten izdeıdi, sonymen qatar zattardy qaıtalama paıdalaný taqyrybyn kóteredi. Onyń týyndysy qala matrısasyna, megapolıs pen onyń turǵyndarynyń ózara árekettesýine baǵyttalǵan. Lermontov atyndaǵy drama teatryna qarama-qarsy Sáken Narynovtyń «Ómir aǵashy» shyǵarmasyn kórýge bolady.
«Qazirgi zamanǵy óner qalalyq ortamen ózara baılanysýy kerek. Festıvál qatysýshylary megapolısti ashyq aspan astyndaǵy úlken mýzeıge aınaldyrady, ony kez kelgen adam tegin kóre alady. Bizdiń jumysymyzdyń qala kúnine arnalǵan merekelik bezendirýdiń bir bóligi bolǵany qýantady»,-deıdi Artbatfest festıvaliniń art-dırektory Vladıslav Slýdskıı.
Apple Fest festıvalinde Tuńǵysh Prezıdent saıabaǵynda kóptegen taqyryptyq fotoaımaq men ınstallásıalar ornatylǵan. Olardyń ishinde almadan jasalǵan qazaqtyń ulttyq órnekterin atap kórsetýge bolady. Uıymdastyrýshylardyń arqasynda saıabaq ulttyq dástúrlerdi beıneleıtin erekshe túrde kórindi.
