Memleket basshysy jazýshy, Qazaqstannyń Eńbek Eri Ákim Tarazıdiń dúnıeden ótýine baılanysty kóńil aıtý jedelhatyn joldady
Qasym-Jomart Toqaev asa kórnekti jazýshy, dramatýrg, Qazaqstannyń Eńbek Eri Ákim Tarazıdiń qaıtys bolýyna baılanysty onyń jubaıy, Memlekettik syılyqtyń ıegeri Roza Muqanova men balalaryna kóńil aıtty.
– Ákim Tarazı búkil sanaly ǵumyryn sóz ónerine arnaǵan, tól ádebıetimiz ben mádenıetimizdi tórge ozdyrǵan ultymyzdyń birtýar perzenti edi. Daryndy qalamger qazaq prozasynyń kókjıegin keńeıtti, ulttyq kıno jáne dramatýrgıa salasyna ólsheýsiz úles qosty. Asyl muratynan eshqashan aınymaǵan qalam ıesin kózi qaraqty oqyrman «Ádebıet áleminiń Ákimi» dep ardaq tutty, zıaly qaýym onyń shyǵarmashylyǵymen qatar adamgershilik qasıetterin erekshe baǵalady. Ónegeli ómir súrip, sońyna mol mura qaldyrǵan Ákim Tarazıdiń jarqyn beınesi halqymyzdyń júreginde máńgi saqtalady, – delingen jedelhatta.