Endi eń tómengi kómek 37 389 teńge bolady.
Bul týraly Oqý-aǵartý mınıstrligi Balalardyń quqyqtaryn qorǵaý komıteti tóraǵasynyń orynbasary Dýlat Jekebaev málimdedi, dep habarlaıdy Almaty-akshamy.kz
«Buǵan deıin arnaıy sanattaǵy balalardy mektepke daıyndaý úshin memleket esebinen bólinetin qarajat mólsheri 17-40 myń teńge aralyǵynda bolatyn. Taıaýda bul normaǵa mınıstrlik usynysy boıynsha ózgerister engizildi. Endi eń tómengi kómek - 37 389 teńge bolady. Sondaı-aq, jergilikti atqarýshy organdardyń usynysymen kómek kórsetý tetigine ózgerister engizildi. Endi aqsha ata-analardyń shotyna tikeleı aýdarylady. Buǵan deıin qajetti zattardy ákimdikter satyp alatyn. Sondyqtan da taýardyń kólemine, sapasyna baılanysty máseleler týyndaıtyn», - dedi Dýlat Jekebaev.
Bıyl materıaldyq kómek ataýly áleýmettik kómek alatyn otbasylardyń balalaryna, AÁK almaıtyn, biraq ortasha tabysy kúnkóris deńgeıinen tómen otbasylardyń balalaryna beriledi.
Negizgi qoldaý sharalaryn ákimdikter júzege asyratyndyqtan, bıyl olar qarjylaı kómek alatyn barlyq balaǵa 37 389 teńge kóleminde qarajat bóledi. Búgingi tańda bul somadan da artyq qarjy bóletin jergilikti atqarýshy organdar bar.