Kúdiktiden untaq tárizdi, erekshe ıisti 15 býma tabylyp, tárkilendi.
Almatyda esirtki «qoıyp ketýshi» qylmys ornynda ustaldy, dep habarlaıdy Almaty-akshamy.kz Polisia.kz-ke silteme jasap.
Áýezov aýdanynyń polısıa qyzmetkerlerimen júrgizilgen jedel izdestirý is-sharalary barysynda 19 jastaǵy Ý. esimdi azamat ustaldy. Ol QR QK-niń 297-baby 3-bóliginde (Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý) kózdelgen qylmystyq quqyqbuzýshylyqty jasady degen kúdikke ilindi.
«Sotqa deıingi tergeý barysynda kúdikti bizdiń aýdan aýmaǵynda psıhotroptyq zat – mefedron salynǵan baılamdardy tyǵyp ketip júrgendigi anyqtaldy. Tintý kezinde kúdiktiden erekshe ıisi bar, untaq tárizdi 15 oqshaýlanǵan býma tabyldy jáne tárkilendi», – dedi Áýezov aýdandyq polısıa basqarmasynyń bastyǵy Ulan Ábilqaıyr.
Kúdikti óziniń barlyq qozǵalysyn telefonyndaǵy arnaıy qosymshaǵa jazyp otyrǵan. Bul – onyń «is-áreketiniń» basty dáleli boldy. Ustalǵan azamat ýaqytsha ustaý ızolátoryna qamaldy. Tergeýshiler birqatar arnaıy saraptamalar taǵaıyndady, qorytyndysy boıynsha prosesýaldyq sheshim qabyldanatyn bolady.