Aǵashty aıaýsyz kesý tyıylar emes
«Tabıǵat» ekologıalyq qaýymdastyqtar men kásiporyndar odaǵynyń tóraǵasy Mels Eleýsizov tabıǵat janashyry retindegi jumysyn jandandyrýǵa nıetti, dep habarlaıdy Almaty-akshamy.kz QazAqparatqa silteme jasap.
«Bul ispen aınalysqanyma 35 jyl boldy. Partıa problemalardy Parlament tórinde aıtý úshin qajet. Al Parlament kópshiliktiń basymdyǵy qaǵıdaty boıynsha jumys isteıdi. Qazir partıa quratyn sát kelip tur. Maǵan Prezıdenttiń kóppartıalyq týraly aıtyp júrgeni unaıdy. Biraq partıany áýeli qurý kerek. Bul iste eń mańyzdy másele – adamdardyń qyzyǵýshylyǵy. Qazir saıasat týraly aıtýshylar kóp. Men ekologıalyq partıa qurý týraly usynys kóterdim. Biraq ol úshin kóp adam qajet. Qazir eldiń ishinde bul máselede túsinistik bar. Ekologıaǵa qatysy joq sala nemese adam bolmaıdy. Bárimizdiń qatysymyz bar. Qazaqstan úshin bul - erekshe másele. Ekologıa – ómirdiń negizi. Ekologıalyq partıa qurý jumysyn qaıta jandandyrýdy usynamyn. Bul partıa ekologıa problemalarymen ǵana aınalyspaýy kerek. Óıtkeni adam júrgen jerde ekologıa máselesi qosa júredi», - dedi ekolog.
Onyń paıymynsha, partıa qurý – memleketke qajet sharýa.
«Saıası baǵyt durys tańdalsa jetistik te bolady. Barsha jurtty ekologıa máselesimen saıası deńgeıde aınalysýǵa shaqyramyn. Halyqtyń ekologıalyq sanasy jetilgen bolýy kerek. Bul – bolashaqtyń qamy. Biz quratyn partıany halyqtyń qoldaǵany kerek», - deıdi Mels Eleýsizov.
Sondaı-aq, ol kún tártibinde turǵan ózekti ekologıalyq problemalar tóńireginde oı qozǵady.
«Aǵashty aıaýsyz kesý tyıylar emes. Almatyda jaıdan-jaı talaı aǵash otaldy. Bul Almatynyń ómirine qaýipti. Ekologıa máselesi tym aýqymdy. Sondyqtan eshkim eshteńeni sheshe almaı otyr. Kez kelgen máseleni ekologıa turǵysynan qaraýǵa bolady. Iaǵnı, sheshim qabyldaǵan kezde ekologıalyq turǵydan kelsek, nátıje bolady. Qazir klımattyń jylynýy beleń alyp tur. Tabıǵı resýrstar sarqylyp jatyr. Tipti óte az qaldy. Ekologıa mınıstrliginiń geologıalyq barlaýǵa mán berýi tegin emes. Qazir shara qoldanbasaq, qapy qalamyz. Qazirdiń ózinde terıtorıamyzdyń 4% sýǵa aınalyp ketti. Muzdyqtardyń 44% erip joǵaldy. Bulaı kete berse, sýsyz qalamyz. Bul iske saýatty kelý kerek», - deıdi tabıǵat janashyry.
Qazir búkil eldiń aýzynda júrgen Sorbulaqtyń máselesimen ol 35 jyldan beri alysyp kele jatqanyn aıtty.
«Meniń buǵan deıin aıtqandarymnyń bári shynǵa aınalyp otyr. Qazir ahýal qıyn. Sorbulaq búlinse, Balqash aýdany, İle aýdanynyń jartysy qaýip astynda qalady. Bári bul máseleni jyly jaýyp qoıǵysy keledi. Biraq problemadan qashqanmen qutylmaısyń. «Tabıǵat – salıqaly uıym. Biz problemany kórsetip qanaı qoımaı, sheshý jolyn usynamyz. Sorbulaq máselesi boıynsha bizden basqa eshkim naqty sheshim usynǵan da joq», - deıdi «Tabıǵat» ekologıalyq qaýymdastyqtar men kásiporyndar odaǵynyń tóraǵasy.
QR Prezıdenti janyndaǵy Qazaqstan strategıalyq zertteýler ınstıtýtynyń áleýmettik-saıası zertteýler bóliminiń basshysy Indıra Rystınanyń aıtýynsha, jastar arasynda ekologıalyq partıaǵa degen suranys joǵary.