Baýyrjan Aldabergenuly úshin ár tań ota jasaýmen bastalady
Sońǵy aqparǵa sáıkes, eldegi 2 mıllıon adam júrek-qan tamyrlary aýrýyna shaldyqqan, dep habarlaıdy Almaty-akshamy.kz Almaty.tv-ge silteme jasap.
Baýyrjan Aldabergenuly úshin ár tań ota jasaýmen bastalady. 10 jylda ol 2000-nan asa túrli deńgeıdegi operasıalarǵa qatysqan. Atalǵan sala boıynsha aldyńǵy qatarda júrgen maman júrekke buryn jasalmaǵan mınıızvazıvti otany engizgen. Jalpy, aýyr patologıadaǵy naýqastar aldyna kóp keletin abzal jan jýyrda ǵana kúrdeliliktiń 6-deńgeıindegi operasıasyn ótkizipti.
«Keshki saǵat 18:00 naýqasty otaǵa aldyq, kelesi kúngi tańǵy 7:00-de bitti. Biz úshin bul – jeńis, sebebi 12-13 saǵatqa sozylǵan ota sátti aıaqtalyp, naýqas bir aptadan keıin úıine shyǵaryldy», – dedi A.N. Syzǵanov atyndaǵy Ulttyq ǵylymı hırýrgıa ortalyǵy kardıohırýrgıa bóliminiń meńgerýshisi Baýyrjan Raqyshev.
«Tıisti kómek der kezinde kórsetilmese, mundaı jaǵdaıda naýqastardyń 95 paıyzyn qutqarý múmkin bolmaıdy» deıdi maman. Sondyqtan, bir adamdy aman alyp qalý úshin bir emes, birneshe dáriger bilgenin ortaǵa salady, qoldan kelgenin jasaıdy. Mindetimiz dep biletin olardyń eńbegin kópshilik erlikke balaıdy.
Qazirgi tańda álemdik tájirıbede júrekke jasalýy tıis otanyń bári Qazaqstanda da júzege asyp jatyr. Bul rette árıne, mamandardyń biliktiligi negizgi ról oınaıdy. Al naýqastyń aıyǵyp ketýine kásibı sheberlikpen birge, adamı faktordyń da áseri zor.
«Eń aldymen, dáriger bolatyn adamnyń boıynda onyń adamgershilik qasıeti bolýy, adamǵa jany ashýy kerek. Másele sonda. Bilesizder, dárigerlerde naýqasty ultqa, ulysqa, dinge, jynysqa bólý degen joq. Adamzat balasynyń barlyǵyn emdeýge biz daıynbyz», – dedi A.N.
Syzǵanov atyndaǵy Ulttyq ǵylymı hırýrgıa ortalyǵy kardıohırýrgıa bóliminiń meńgerýshisi Baýyrjan Raqyshev.
Búginde Qazaqstan dárigerleri dál osy júrek aýrýlaryna ota jasaýda sheteldik mamandarmen ózara baılanys ornatyp, ozyq tehnologıalardy elge ákelýde de kóshten qalmaı keledi. Al, adamzattyń amandyǵy, jumyr jerdiń tutastyǵy úshin qyzmet qylyp júrgenderdiń eńbegin eleý – el mindeti.