Bul - Oqý-aǵartý mınıstriniń sózi.
Aımaǵambetov ishki ister organdarynan oqý jylynyń basynda mektep janyndaǵy kezekshilikti kúsheıtip, qajet jerlerge arnaıy jol belgilerin qoıýdy surady, dep habarlaıdy Almaty-akshamy.kz
Oqý-aǵartý mınıstri Asqat Aımaǵambetov pen İshki ister mınıstri Marat Ahmetjanov jańa oqý jyly qarsańynda oqýshylardyń qaýipsizdigi máseleleri boıynsha keńes ótkizdi.
Aımaǵambetovtiń aıtýynsha, jergilikti atqarýshy organdar mektepter beınekameramen 100% qamtylǵany týraly esep beredi, biraq teksere kelgende, eleýli kemshilikter anyqtalyp jatady. Kameralardyń bári birdeı jumys istemeıdi, qala mektepteriniń bir bóligi jedel basqarý ortalyǵyna qosylmaǵan. Mınıstr kameralardyń sany emes, osy kameralardyń qansha balany qamtıtyny mańyzdy ekenine basa nazar aýdardy.
Oqý-aǵartý mınıstrligi jańa oqý jyly qarsańynda İshki ister mınıstrligi ókilderimen birlesip, oqýshylardyń qaýipsizdigine qatysty sabaqtar ótkizedi.
«Qyrkúıektiń basynan bastap 5 myńnan astam polısıa qyzmetkeri mektepterge baryp, profılaktıkalyq sabaqtardy birlesip ótkizedi. Buǵan muǵalimder, dırektordyń orynbasarlary jáne dırektorlar belsene qatysady. Oqý jylynyń basynda ishki ister organdarynan mektep janyndaǵy kezekshilikti kúsheıtip, qajet jerlerge arnaıy jol belgilerin qoıyp, aldyn alý sharalaryn júrgizýdi suraımyz. Barlyq mektep avtobýstaryn, sondaı-aq qaýipsizdik júıelerin tekserýdi aıaqtaý qajet. Bul jumysty birlesip atqaramyz dep oılaımyn», - dedi Aımaǵambetov.
Sondaı-aq ol kásibı kúzet agenttikteri mektepterdiń erekshelikterin bilýi qajet ekenin aıtty. Onymen qosa, tájirıbeli qyzmetkerlerdiń jıi aýyspaǵanyn, mekteptiń erekshelikterin bilýi úshin olardy turaqty jumyspen qamtamasyz etý keregine toqtaldy.
«Biz bul máselelerdi jumys tártibinde sheshýdi usynamyz jáne bilim berý uıymdarymen jumys isteıtin lısenzıasy bar kúzet uıymdaryna qoıylatyn qazirgi talaptarǵa jeke tarmaq engizdik», - dedi Aımaǵambetov.
İshki ister mınıstri Marat Ahmetjanov vedomstvonyń barlyq jeke quramy oqýshylar arasynda túsindirý jumystaryn júrgizetinin málimdedi. Oqýshylarǵa olardyń quqyqtary men mindetteri túsindirilip, quqyqbuzýshylyqtyń aldyn alý, tótenshe jaǵdaılarda qalaı áreket etý keregi aıtylady. İİM basshysy elordalyq gımnazıalardyń birine ózi de baratynyn atap ótti.
İİM basshysy ákimdikter ortalyq memorgandarmen birlesip, mektepterdegi tártipti qamtamasyz etý jumystaryn kúsheıtýi qajet ekenin aıtty.
Otyrys qorytyndysy boıynsha bilim berý uıymdary men quqyq qorǵaý organdarynyń basshylaryna tıisti tapsyrmalar berildi.