Mektep tamaqtanýyna ulttyq taǵamdardy engizý – bala densaýlyǵyn saqtaýdaǵy mańyzdy qadam
Bishkekte TMD elderiniń «Mekteptegi tamaqtaný – jalpy damýdyń baǵyty» taqyrybynda birinshi halyqaralyq forým ótti. Oǵan Qazaqstan Respýblıkasynyń Oqý-aǵartý birinshi vıse-mınıstri Natalá Jumadildaeva qatysty, dep habarlaıdy Almaty-akshamy.kz Oqý-aǵartý mınıstrligine silteme jasap.
Onyń aıtýynsha, óńirlerde shyǵarylǵan otandyq ónimderdi paıdalana otyryp, mektep tamaqtanýyna ulttyq taǵamdardy engizý – balalar densaýlyǵyn saqtaýdaǵy mańyzdy qadamdardyń biri. Osy maqsatta mınıstrlik Ulttyq salaýatty tamaqtaný ortalyǵymen birlesip, Astananyń alty mektebinde «Ulttyq mektep asqanasy» pılottyq jobasyn júzege asyrýda. Jańa úlgide mekteptegi tamaqtaný mádenıetin qalyptastyrý boıynsha kezeń-kezeńimen sharalar kesheni qarastyrylǵan.
«Árbir mektep oqýshylardyń «salaýatty ómir saltyn ustanatyn mektebine» aınalýy tıis. Mekteptiń kez-kelgen qyzmeti saýyqtyrý-pedagogıkalyq baǵytta bolady. «Ulttyq mektep asqanasy» jobasy ulttyq taǵam mádenıetin qalyptastyrýǵa jáne mekteptiń as mázirine 50 ulttyq taǵamdy engizýge múmkindik beredi. Bul kóp ǵasyrlyq dástúr boıynsha jasalǵan mázir, ejelden kele jatqan tájirıbeniń nátıjesi», - dedi Natalá Jumadildaeva.
Esterińizge sala keteıik, bıylǵy jyldyń qyrkúıek aıynan beri 1,6 mıllıonnan astam bala tegin ystyq tamaqpen qamtyldy, onyń ishinde 1,4 mıllıon bala 1-4 synyp oqýshylary jáne 200 myńnan astamy áleýmettik osal top sanatyndaǵy 5-11 synyp oqýshylary.
Sapaly tamaqtanýdy uıymdastyrý maqsatynda mınıstrlik bilim berý uıymdaryndaǵy balalardyń tamaqtaný normalaryn qaıta qarady. Atap aıtqanda, as mázirine óńirlerde óndirilgen otandyq ónimderdi engizý normasy qosyldy. Brakerajdy komısıalardyń jáne vedomstvoaralyq sarapshylyq toptardyń múshelerine arnalǵan monıtorıńtik toptardyń qyzmetiniń tártibi týraly zańnamalyq normalar bekitildi.
Mektepterde tamaqtaný mádenıetin qalyptastyrýǵa erekshe kóńil bólinýde. Atap aıtqanda, sanıtarlyq tazalyq pen gıgıenany saqtaý, dastarhan servırovkasy jáne durys tamaqtanýdy nasıhattaý. Bilim berý uıymyna jetkizilgen barlyq ónimderdiń sanıtarlyq dárigerlerden qorytyndylary bolýy kerek, al tamaqty brakerajdy komısıalar baqylaıdy. Olardyń qatarynda ata-analar men qamqorshylyq keńes, sonymen qatar mektep ákimshiligi men medısına qyzmetkerleri bar.
Forým barysynda jetekshi halyqaralyq ınstıtýttardan, mamandandyrylǵan bilim berý salasyndaǵy sarapshylar men jeke sektordan quralǵan forýmǵa qatysýshylar mekteptegi tamaqtanýdyń tıimdiligi men sapasyn arttyrý jóninde pikir almasty.