Aldar Kóse - bul qazaqtyń Robın Gýdy ispettes. Jarlylarǵa qol ushyn sozý, sarań baılardy aılakerlikpen taqyrǵa otyrǵyzý onyń kúndelikti sharýasy.
Abaı atyndaǵy Qazaq ulttyq opera jáne balet teatrynda Almabek Meıirbekovtyń mýzykasyna jazylǵan, balalarǵa arnalǵan, qazaq aýyz ádebıeti arqyly qalyń kópshilikke tanys «ALDAR KÓSE» ertegisi boıynsha sahnalanǵan baleti kórsetiledi, dep habarlaıdy Almaty-akshamy.kz.
Abaı atyndaǵy Qazaq ulttyq opera jáne balet teatrynyń sahnasynda san-túrli boıaý, qımyl men mýzyka bir arnaǵa toǵysqan jarqyn týyndy kórermen qaýymdy ǵajaıyptar álemine jetelep áketetini sózsiz: ala-qula ómir bultarystaryna qaramastan, úlken júregi bar kishkentaı Aldar jaıly baıandaıtyn bul oqıǵa mahabbat pen janashyrlyqtyń ǵalamat kúshin kórsetedi.
Teatrdyń sahnasynda 30 jyldan astam ýaqyt buryn kórnekti qazaq baletmeısteri Mentaı Tleýbaev qazaq kompozıtory Almabek Meıirbekovpen birge «Aldar Kóse» baletin bastaǵan edi. Ókinishke oraı, balettiń mýzykasy aıaqtalmaı qalǵan. Araǵa 30 jyl salyp, atalmysh baletti kórermen nazaryna usyný kórnekti baletmeıster Mentaı Tleýbaevtyń uly ári izbasary, Japonıa balet teatrynyń jetekshi balet solısi, baletmeıster, Maılen Tleýbaevtyń enshisine buıyrdy.
A.Meıirbekovtyń ǵajap áýezdi mýzykasy qoıýshy-rejısser Maılen Tleýbaevtyń qıalyndaǵy barlyq keıipkerler men sújetin keremet sýretteıdi. Mýzykasy jańa qoıylymnyń mán-maǵynasynyń tereńdigin ashýǵa, keıipkerdiń kóńil-kúıin kórermenge jetkizýde aıryqsha oryn alady. Jańa qoıylym mýzykanyń alǵashqy áýeni estilgen sátten óziniń sulýlyǵymen kórermen kóńilin baýrap alady. Dekorasıalar men kostúmder ulttyq naqyshty beınelese, horeografıasy men ártisterdiń akterlik sheberligi ertegini naǵyz ǵajaıyp álemge jeteleıdi.
Jańa jyl qarsańynda óz kórermenderimizdi, ásirese, kishkentaı kórermenderimizdi áserli is qımyldan qurylǵan naǵyz otbasylyq spektáklge shaqyramyz.